ក្រសួងអប់រំ យុវជន និងកីឡា បានប្រកាសថា មានបេក្ខជនចំនួន ១៤១ ​០៥៦នាក់ បានប្រឡងជាប់​សញ្ញាបត្រមធ្យមសិក្សាបឋមភូមិ សម័យប្រឡង១៥ ខែវិច្ឆិកា ឆ្នាំ២០២១។  លទ្ធផលនេះ ស្មើនឹង​៩៥,៩៧ភាគរយ ធៀបនឹងបេក្ខជនសរុប ១៤៥ ៦៦៨នាក់ ដែលបានចូលរួមប្រឡង។

 

​បើតាមសេចក្តីប្រកាសព័ត៌មានរបស់ក្រសួងអប់រំ ​កាលពីថ្ងៃទី២៣ ខែវិច្ឆិកា ការប្រឡងសញ្ញាបត្រមធ្យមសិក្សាបឋមភូមិ សម័យប្រឡង១៥ ខែវិច្ឆិកា ឆ្នាំ២០២១ មានបេក្ខជនចុះ​ឈ្មោះប្រឡងសរុប ១៥៤ ៨៩៩ នាក់ ក្នុងនោះមាន​បេក្ខជនចំនួន ៩ ២០២នាក់ ឬស្មើនឹង៦,៣១ភាគរយបានអវត្តមាន។ ចំពោះមណ្ឌលប្រឡងវិញមានចំនួន ១ ៧១៧មណ្ឌល ចែកចេញជា៧ ០៦៧ ​បន្ទប់ប្រឡង។

 

​ក្រសួងអប់រំ បានគូសបញ្ជាក់ថា ការប្រឡងឌីប្លូមឆ្នាំ២០២១ បានប្រព្រឹត្តទៅដោយរលូន តាមគោលការណ៍ច្បាប់ យុត្តិធម៌ តម្លាភាព និងប្រកបដោយសុវត្តិភាព និងសណ្ដាប់​ធ្នាប់៕