ជាតិ
ចលនាយុវជន ដ៏ធំប្រារព្ធខួបកំណើត៤៣ឆ្នាំ
× សហភាពសហព័ន្ធយុវជនកម្ពុជា នឹងរៀបចំកម្មវិធីខួបឆ្នាំទី៤៣របស់ខ្លួន នៅព្រឹកថ្ងៃអាទិត្យ ទី២៨ខែវិច្ឆិកា ឆ្នាំ២០២១ នៅអគារខេមរានីក្នុងសង្កាត់ព្រែកលាភ។
លោក ហ៊ុន ម៉ានី នឹងដឹកនាំប្រារព្ធខួបលើកទី៤៣នៃកំណើតរបស់សហភាពសហព័ន្ធយុវជនកម្ពុជានោះ។ មនុស្សប្រមាណ២០០នាក់ដែលជាសមាសភាពថ្នាក់ដឹកនាំ ជាសមាជិកគណៈកមា្មធិការកណ្ដាល និងជាតំណាងសមាជិកនីតិបុគ្គល នឹងចូលរួមអបអរកម្មវិធីរយៈពេលមួយព្រឹកដែលនឹងត្រូវផ្សព្វផ្សាយផ្ទាល់ផងតាមរយៈទូរទស្សន៍ព័ត៌មាន BTV។
សហភាពសហព័ន្ធយុវជនកម្ពុជា ត្រូវបានប្តូរឈ្មោះពី សមាគមយុវជនកម្ពុជានៅឆ្នាំ២០១២ ដែលមានឋានៈជាអង្គការមិនមែនរដ្ឋាភិបាលមួយ។ តាមពិត សមាគមយុវជនកម្ពុជា មានឈ្មោះដើមជា សមាគមយុវជនសង្គ្រោះជាតិកម្ពុជាដែលត្រូវបានបង្កើតឡើងទន្ទឹមគ្នានឹងរណសិរ្សសាមគ្គីសង្គ្រោះជាតិកម្ពុជានៅថ្ងៃទី២ខែធ្នូឆ្នាំ១៩៧៨។ កាលណោះ សមមិត្ត ហ៊ុន សែន ដែលជាស្ថាបនិកមួយរូបនៃរណៈសិរ្ស គឺជាអ្នកទទួលបន្ទុកលើការងារយុវជននេះ។
នៅឆ្នាំ២០១២ នៅក្នុងក្របខណ្ឌនៃមហាសន្និបាតលើកទី៣ នាថ្ងៃទី២-៣ ខែវិច្ឆិកា លោក ហ៊ុន ម៉ានី ដែលមុននេះមានតួនាទីជាអនុប្រធានសមាគមយុវជនកម្ពុជាហើយនោះ ត្រូវបានបោះឆ្នោតជាប្រធានសមាគម ហើយដែលត្រូវបានផ្លាស់ប្តូរឈ្មោះមកជាសហភាពសហព័ន្ធយុវជនកម្ពុជានៅក្នុងមហាសន្និបាតនោះ។
សហភាពសហព័ន្ធយុវជនកម្ពុជា ជាកន្លែងប្រមូលផ្ដុំយុវជនគ្រប់មជ្ឈដ្ឋានដោយមិនប្រកាន់ ពូជសាសន៍ សាសនា ឋានៈសង្គម និងជាពិសេសនិន្នាការនយោបាយ ដើម្បីបង្កើតជាកម្លាំងសាមគ្គីរួមចំណែកអភិវឌ្ឍប្រទេសកម្ពុជាដែលឯករាជ្យ សន្តិភាព សេរីភាព ប្រជាធិបតេយ្យ។ សហភាពសហព័ន្ធយុវជនកម្ពុជាក៏មានបេសកកម្មបណ្ដុះបណ្ដាលសមត្ថភាពយុវជនទូទាំងប្រទេស និងដឹកនាំជំរុញទឹកចិត្តឱ្យពួកគេធ្វើកិច្ចការមនុស្សធម៌ និងកិច្ចការសង្គមដោយស្ម័គ្រចិត្តផងដែរ៕
© រក្សាសិទ្ធិដោយ thmeythmey.com