ជាតិ
កម្ពុជា ទទួលបានវ៉ាក់សាំងកូវីដ-១៩ ជាង៣លានដូសហើយពីយន្តការកូវ៉ាក់
× កម្ពុជា ទទួលបានវ៉ាក់សាំង ជាង៣លានដូសហើយ តាមរយៈយន្តការកូវ៉ាក់ គិតត្រឹមថ្ងៃទី ២៨ ខែវិច្ឆិកា។ តាមអង្គការយូនីសេហ្វ នឹងមានវ៉ាក់សាំង Astra Zeneca និងSinovac សរុប៩០ម៉ឺនដូសបន្ថែមទៀត នឹងដឹកមកដល់កម្ពុជាត្រឹមដំណាច់ឆ្នាំ២០២១នេះ។ ក្នុងជំហានដំបូង មជ្ឈមណ្ឌលកូវ៉ាក់ បានកំណត់ការផ្តល់វ៉ាក់សាំងបង្ការជំងឺកូវីដ-១៩ ប្រមាណ ៦.៦លានដូសសម្រាប់ប្រទេសកម្ពុជា។
វ៉ាក់សាំងកូវីដ-១៩ ប្រភេទ ម៉ូដឺណា (Moderna) ចំនួន១៨៨,១៦០ដូស ដែលផលិតនៅសហរដ្ឋអាម៉េរិក បានដឹកមកដល់កម្ពុជា កាលពីព្រលប់ថ្ងៃទី២៨ ខែវិច្ឆិកា។ វ៉ាក់សាំងនេះ គឺជាជំនួយរបស់មជ្ឈមណ្ឌលកូវ៉ាក់ (COVAX Facility)។ មកទល់ពេលនេះ កូវ៉ាក់បានផ្តល់វ៉ាក់សាំងជាង ៣លានដូសហើយមកឱ្យកម្ពុជា ក្នុងចំណោមវ៉ាក់សាំងប្រមាណ ៦.៦លានដូស ដែលយន្តការនេះ បានសន្យានៅក្នុងជំហានដំបូង។
អ្នកស្រី Foroogh Foyouzat តំណាងអង្គការយូនីសេហ្វ (UNICEF) ប្រចាំកម្ពុជា បានបញ្ជាក់នៅក្នុងពិធីទទួលវ៉ាក់សាំង Moderna នៅព្រលប់ថ្ងៃទី២៨ ខែវិច្ឆិកា នៅឯព្រលានយន្តហោះអន្តរជាតិភ្នំពេញថា កម្ពុជានឹងទទួលបានវ៉ាក់សាំងប្រភេទ Astra Zeneca និង Sinovac សរុប៩០ម៉ឺនដូសបន្ថែមទៀត តាមយន្តកូវ៉ាក់ នៅត្រឹមដំណាច់ឆ្នាំ២០២១នេះ។ មានន័យថា កូវ៉ាក់ បានផ្តល់វ៉ាក់សាំង ប្រមាណ៦០ភាគរយ នៃការសន្យារបស់ខ្លួន មលឱ្យប្រទេសកម្ពុជា។ នេះជាការបន្ថែមរបស់ តំណាងអង្គការយូនីសេហ្វប្រចាំកម្ពុជា។
មកដល់ពេលបច្ចុប្បន្ន កម្ពុជាមានវ៉ាក់សាំងកូវីដ-១៩ សរុប ៤០ ២៣០ ០០០លានដូស ក្នុងនោះកម្ពុជាបានបញ្ជាទិញពីប្រទេសចិនជាង៣០លានដូស។ ចំណែកវ៉ាក់សាំង ដែលកម្ពុជា ទទួលបានតាមរយៈយន្តការកូវ៉ាក់នោះ មានជំនួយរបស់សហរដ្ឋអាម៉េរិក ជាង១លានដូសជាប្រភេទ Johnson&Johnson, ជំនួយពីរដ្ឋាភិបាលជប៉ុន ប្រមាណ១លានដូសប្រភេទ Astra Zeneca, ប្រភេទ Sinova ជាង១២ម៉ឺនដូស, វ៉ាក់សាំង Moderna ជាង១៨ម៉ឺនដូស និងវ៉ាក់សាងប្រភេទ Astra Zeneca ជិត៦៥ម៉ឺនដូសទៀតដែរ តាមយន្តការអន្តរជាតិមួយនេះ។ គិតត្រឹមថ្ងៃទី ២៨ ខែវិច្ឆិកា កម្ពុជាបានចាក់វ៉ាក់សាំងដល់ពលរដ្ឋជាង ១៣.២លាននាក់ ៨៨ភាគរយហើយ ធៀបនឹងចំនួនប្រជាជនសរុប ១៦លាននាក់៕
Tag:
យន្តការកូវ៉ាក់
វ៉ាក់សាំង
Moderna
© រក្សាសិទ្ធិដោយ thmeythmey.com