ជាតិ
នយោបាយជាតិ
ខួប៥៥ឆ្នាំនៃចំណងការទូត កម្ពុជា-វៀតណាម នឹងរួមគ្នាផ្សព្វផ្សាយពីប្រវត្តិសាស្ត្រនៃការជួយគ្នាទៅវិញទៅមក
× លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ បានទទួលជួបលោក ង្វៀន ហ៊ុយតាំង (Nguyen Huy Tang) ឯកអគ្គរដ្ឋទូតថ្មីរបស់វៀតណាមប្រចាំកម្ពុជា កាលពីថ្ងៃទី៣០ ខែវិច្ឆិកា។ ភាគីទាំងពីរបានផ្លាស់ប្តូរយោបល់គ្នាលើបញ្ហាជាច្រើន ក្នុងនោះមានទាំងគម្រោងសកម្មភាពនាឱកាសអបអរសាទរខួបលើកទី៥៥ នៃទំនាក់ទំនងការទូតរវាងប្រទេសទាំងពីរនាឆ្នាំ២០២២ ផងដែរ។
«កម្ពុជា និងវៀតណាម មានទំនាក់ទំនង និងកិច្ចសហប្រតិបត្តិការទ្វេភាគី កាន់តែល្អប្រសើរឡើងពីមួយថ្ងៃទៅមួយថ្ងៃ»។ នេះជាការកត់សម្គាល់របស់លោក ង្វៀន ហ៊ុយតាំង ដែលបានអះអាងថាស្គាល់កម្ពុជាយ៉ាងច្បាស់តាមរយៈបទពិសោធន៍ជាង១០ឆ្នាំនៅកម្ពុជា។
នាឆ្នាំ២០២២ ខាងមុខ ប្រទេសទាំងពីរនឹងអបអរខួបលើកទី៥៥នៃទំនាក់ទំនងការទូត ដោយភាគីទាំងពីរបានឯកភាពលើសកម្មភាពរួមគ្នាមួយចំនួន ដូចជាការរៀបចំបង្ហាញវប្បធម៌រវាងប្រទេសទាំងពីរ និងការពង្រឹងការផ្សព្វផ្សាយអប់រំ ដើម្បីឲ្យប្រជាជន ជាពិសេសយុវជនជំនាន់ក្រោយមានការយល់ដឹងទូលំទូលាយអំពីប្រវត្តិសាស្ត្រនៃការជួយគ្នាទៅវិញទៅមករវាងប្រទេសទាំងពីរ។
យោងតាមសេចក្តីប្រកាសព័ត៌មានរបស់ក្រសួងការបរទេស កម្ពុជា និងវៀតណាម ប្តេជ្ញាចិត្តអនុវត្តឲ្យខ្ជាប់ខ្ជួននូវសេចក្តីសម្រេចចិត្តរបស់ថ្នាក់ដឹកនាំ ដោយឈរលើស្មារតីមិត្តភាព សាមគ្គីភាព ភាពជាបងប្អូនដែលជាតែងតែជួយគ្នាទៅវិញទៅមក។
ជាមួយគ្នានេះ លោក ប្រាក់ សុខុន និងលោក ង្វៀន ហ៊ុយតាំង បានឯកភាពគ្នាជំរុញទៅភាគីពាក់ព័ន្ធរៀងៗខ្លួនឲ្យឆាប់បញ្ចប់ការងារការបោះបង្គោលព្រំដែនគោកដែលនៅសេសសល់ប្រមាន ១៦ភាគរយឲ្យបានឆាប់រហ័ស៕
© រក្សាសិទ្ធិដោយ thmeythmey.com