សម្ដេច ហ៊ុន សែន គាំទ្រកូនឱ្យធ្វើនាយករដ្ឋមន្រ្តី ដែលឆ្លងកាត់ការបោះឆ្នោត

ជាតិ

សម្ដេច ហ៊ុន សែន គាំទ្រកូនឱ្យធ្វើនាយករដ្ឋមន្រ្តី ដែលឆ្លងកាត់ការបោះឆ្នោត

02, Dec 2021 , 9:31 am

រូបភាព

ដោយ: ធឿន បញ្ញាឬទិ្ធ

ពិធីសម្ពោធដាក់ឱ្យប្រើប្រាស់នូវសមិទ្ធផលជាច្រើន ក្នុងខេត្តព្រះសីហនុ នៅថ្ងៃទី២ ធ្នូ នេះ សម្ដេច ហ៊ុន សែន បានប្រកាសគាំទ្រកូនឱ្យធ្វើជានាយករដ្ឋមន្ត្រីបន្ត ដែលឆ្លងកាត់ការបោះឆ្នោត។

«ហ៊ុន ម៉ាណែត ជាបេក្ខភាពមួយរូប ក្នុងចំណោមបេក្ខភាពនាយករដ្ឋមន្ត្រី»។ នេះជាការបង្ហើបរបស់សម្ដេច ហ៊ុន សែន ដែលបានចោទជាសំនួរវិញថា កូនអ្នកដទៃធ្វើនាយករដ្ឋមន្រ្តីបន្តបាន ហេតុអ្វីកូនសម្ដេច ធ្វើមិនបាន?

ត្រង់ចំណុចនេះ ប្រមុខរដ្ឋាភិបាល បានលើកយកករណីលោក ស៊ិន ហ្ស៊ូអាបេ ដែលមានឪពុកជាអតីតរដ្ឋមន្ត្រីការបរទេស លោក ស៊ិន តារ៉ូអាបេ និងមានជីតាជាអតីតនាយករដ្ឋមន្រ្តី ហើយក្រោយមកលោក អាបេ ក្លាយជានាយករដ្ឋមន្ត្រី។ លោក អាបេ បានកាន់តំណែងនាយករដ្ឋមន្ត្រី២លើក ២០០៦ ដល់២០០៧ និង២០១២ ដល់២០២០ ដោយសុំលាលែងចេញពីតំណែង ដោយសារបញ្ហាសុខភាព។ អាបេ កាន់តំណែងជានាយករដ្ឋមន្ត្រីយូរជាងគេ នៅក្នុងប្រទេសជប៉ុន។

បើតាមសម្ដេច ហ៊ុន សែន ទោះបីជាកូនសម្ដេច ឈរឈ្មោះជានាយករដ្ឋមន្ត្រីក្តី ប៉ុន្តែត្រូវឆ្លងកាត់បោះឆ្នោត ។ «អនាគត នៅពេលក្រោយ ហ៊ុន សែន , ហ៊ុន ម៉ាណែត គឺជាបេក្ខភាពមួយ ក្នុងចំណោមនាយករដ្ឋមន្រ្តី មិនមែនមានតែ១នាក់។ ប៉ុន្តែ (ហ៊ុន ម៉ាណែត) ទទួលបានការគាំទ្រពីឪវាពេញលេញ គឺ ហ៊ុន សែន» ។ នេះជាការបន្ថែមរបស់ប្រមុខរដ្ឋាភិបាល ដែលបានបន្តថា បេក្ខភាពនាយករដ្ឋមន្ត្រី មានច្រើនរូបទៀត នៅក្នុងបក្ស ក្នុងនោះ មានលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ផងដែរ។

សម្ដេច ហ៊ុន សែន ក៏ប្រកាសច្បាស់ថា សម្ដេច ស ខេង , សម្ដេច ទៀ បាញ់ , លោកឧបនាយករដ្ឋមន្រ្តី យឹម ឆៃលី មិនធ្វើនាយករដ្ឋមន្រ្តីទេ។ «បើគង់តែ ខេង , បាញ់ , ឆៃលី ធ្វើជានាយករដ្ឋមន្រ្តីដដែល ឱ្យខ្ញុំធ្វើដដែលតែម្ដងទៅ វាមិនស្រួលជាង»។ នេះជាការបន្ថែមរបស់នាយករដ្ឋមន្រ្តី។