នាយករដ្ឋមន្ត្រី ហ៊ុន សែន នៅថ្ងៃទី០២ ខែធ្នូ បានចូលរួមសម្ពោធដាក់ឱ្យប្រើប្រាស់ នូវផ្លូវចំនួន៣៧ខ្សែ ប្រព័ន្ធប្រព្រឹត្តិកម្មទឹកកខ្វក់ចំនួន៣ និងសមិទ្ធផលនានា ក្រោមទំហំទឹកប្រាក់ ៣០០លានដុល្លារ ក្នុងក្រុងព្រះសីហនុ។ ថ្លែងក្នុងពិធីសម្ពោធដាក់ឱ្យប្រើប្រាស់ផ្លូវ នាក្រុងព្រះសីហនុ សម្ដេច ហ៊ុន សែន លើកឡើងដូច្នេះ៖ «ក្នុងចក្ខុវិស័យកសាងផ្លូវនេះ មិនត្រឹមតែសម្រាប់ធ្វើដំណើរប្រកបដោយប្រសិទ្ធភាពប៉ុណ្ណោះទេ ថែមទាំងជាផ្លូវលំហរសាធារណៈ ប្រកបដោយមេត្រីភាព សុវត្ថិភាព និងសីលធម៌, ផ្លូវនៃការជំរុញកំណើនសេដ្ឋកិច្ច, ផ្លូវនៃការលើកកម្ពស់គុណភាពនគរូបនីយកម្ម និងភាពធន់មាំទាក់ទងអាកាសធាតុ និងបរិស្ថាន»។ 
 

យោងតាមរបាយការណ៍របស់ លោក ជា សុផារ៉ា ប្រធានគណៈកម្មាធិការជាតិគ្រប់គ្រងតំបន់ឆ្នេរ ការកសាងនិងអភិវឌ្ឍន៍ខេត្តព្រះសីហនុ  ក្នុងគោលបំណងប្រែក្លាយក្រុងព្រះសីហនុ ឱ្យមានគុណភាពពិតប្រាកដ ទាក់ទាញការវិនិយោគ និងមានការអភិវឌ្ឍ ប្រកួតប្រជែងជាមួយទីក្រុងនានាក្នុងតំបន់។
 

នាឱកាសបើកសម្ពោធនេះ ប្រមុខរដ្ឋាភិបាល ហ៊ុន សែន អំពាវនាវដល់ពលរដ្ឋ ត្រូវចូលរួមបន្តទប់ស្កាត់ ការឆ្លងរាលដាលនៃជំងឺកូវីដ-១៩ ដោយអនុវត្តនូវវិធានការចំបាច់នានា របស់ក្រសួងសុខាភិបាល ជាពិសេសអំឡុងពេលនៃការបើកអាជីវកម្មមួយចំនួន តាមភោជនីយដ្ឋាន អាហារដ្ឋាន ខារ៉ាអូខេ ឌីស្កូតិក ជាដើម ត្រូវអនុវត្តឱ្យបានខ្ជាប់ខ្ជួន៕