Djokovic ធ្លាប់បដិសេធមិនចូលរួមការប្រកួតវាយកូនបាល់ក្នុងប្រទេសអូស្រ្តាលី ប្រសិនបើរដ្ឋាភិបាលមួយនេះ គ្មានការលើកលែងអំពីច្បាប់ចាក់វ៉ាក់សាំង សម្រាប់កីឡាករវាយកូនបាល់ទាំងអស់។ កន្លងមករដ្ឋបាលទីក្រុងមែលប៊ន បានប្រកាសថា អំឡុងពេលការប្រកួតចាប់ពីថ្ងៃទី១៧ដល់៣០ ខែមករាឆ្នាំ២០២២ ទាំងបុគ្គលិក ព្រមទាំងអ្នកគាំទ្រ ដែលស្ថិតនៅក្នុងការប្រកួតចាំបាច់ត្រូវតែចាក់វ៉ាក់សាំងការពារជំងឺកូវីដ-១៩។
 

បើតាមការផ្សាយពីសំណាក់ប្រព័ន្ធផ្សពផ្សាយនាទីក្រុងមែលប៊ន កីឡាករទាំងអស់ដែលមានឈ្មោះទៅប្រកួតក្នុងប្រទេសអូស្រ្តាលី គឺត្រូវចាក់វ៉ាក់សាំង ឬក៏ត្រូវធ្វើច​ត្តា​ឡី​ស័ករយៈពេល១៤ថ្ងៃមុនការប្រកួត។
 

កីឡាករវ័យ ៣៤ឆ្នាំសញ្ជាតិស៊ែប៊ី នឹងត្រូវប្រកួតក្នុងនាមជាកីឡាករការពារតំណែងជើងឯកពានរង្វាន់ Grand Slam នៃកម្មវិធី Australia Open 2022 ដោយរូបគេធ្លាប់បានឈ្នះ Grand Slam កាលពីដើមឆ្នាំ២០២១ នៅប្រទេសអូស្រ្តាលីដូចគ្នា។ កាលពីសប្តាហ៍មុន Djokovic ក៏ធ្លាប់បានបង្ហើបថាប្រាប់សារព័ត៌មានថា៖«ខ្ញុំមិនអាចប្រាប់ពីថ្ងៃណាជាក់លាក់ឡើយ ព្រោះការប្រកួត Australia Open កំពុងតែខិតជិតមកដល់ ពេលនោះអ្នកនឹងដឹងការពិតហើយថាខ្ញុំទៅមិនទៅ។» 
 

កីឡាករសញ្ជាតិស៊ែបីរូបនេះក៏នឹងត្រូវមានឈ្មោះនៅក្នុងក្រុមជម្រើសជាតិស៊ែប៊ី សម្រាប់កម្មវិធី ATP Cup ក្នុងប្រទេសអូស្ត្រាលីដែលធ្វើឡើងននៅខែកុម្ភៈឆ្នាំ ២០២២ ផងដែរ ។ Djokovic ក៏នឹងត្រូវធ្វើច​ត្តា​ឡី​ស័ក ១៤ថ្ងៃ មុនការប្រកួត Australia Open 2022 នៅក្នុងប្រទេសអូស្ត្រាលី៕