Ajax ជាក្រុមទី២ បន្ទាប់ពី Liverpool នៅក្នុងការប្រកួតវគ្គសន្សំពិន្ទុតាមពូលដែលឈ្នះ ៦ប្រកួតជាប់គ្នា។ ការប្រកួតចុងក្រោយក្នុងពូល C Ajax បានយកឈ្នះលើក្រុម Sporting Lisbon ដោយលទ្ធផល ៤-២។ កីឡាករ Sebastien Haller ក្លាយជាកីឡាករទីពីរបន្ទាប់ពី Cristiano Ronaldo ដែលស៊ុតគ្រាប់បាល់៦ប្រកួតជាប់គ្នាគិតតាំងពីរដូវកាល២០១៧-១៨ ។


 

«ការយកឈ្នះប្រកួតនីមួយៗពិតជាលំបាកខ្លាំងណាស់ ប៉ុន្តែពួកយើងបានឈ្នះ៦ប្រកួតជាប់គ្នាក្នុងពូល។ យើងនឹងបានឃើញរឿងរ៉ាវផ្សេងៗទៀតនៅការប្រកួតខាងមុខបន្តទៀត ហើយក្រុមយើងពិតជាមានទំនុកចិត្តពេលនេះ។ គ្មានក្រុមណាមួយឡើយនៅវគ្គ១៦ក្រុមដែលចង់មកជួបយើង ប៉ុន្តែយើងក៏ត្រូវតែធ្វើឱ្យបានល្អនៅវគ្គបន្ទាប់ផងដែរ។»លោក Ten Hag បាននិយាយក្នុងសន្និសីទព័ត៌មានក្រោយចប់ការប្រកួតនាថ្ងៃទី៨ ខែធ្នូ។
 

ក្រោយបញ្ចប់ការប្រកួតពូល C Ajax ឈរលេខមួយមាន ១៨ពិន្ទុពី៦ប្រកួតខណៈក្រុមលេខ២ Sporting Lisbon មាន៩ពិន្ទុ ចំណែក Borussia Dortmund ឈរលេខ៣មាន៩ពិន្ទុដោយជំពាក់គ្រាប់បាល់១គ្រាប់ត្រូវទៅលេង UEFA Europa League៕