លោក Tan Cheng Hoe គ្រូបង្វឹកម៉ាឡេស៊ីប្រកាសនៅថ្ងៃទី៩ ខែធ្នូ ថា កីឡាករខ្លួនពីររូប រួមមានខ្សែបម្រើ Akhyar Rashid ដែលជាប់ឈ្មោះជាកីឡាករឆ្នើមក្នុងជំនួបបើកឆាកពូល B ទល់កម្ពុជា និងខ្សែការពារ Quentin Cheng ឆ្លងកូវីដ-១៩។
 

« Rashid លេងបានល្អណាស់ក្នុងការប្រកួតដំបូង ប៉ុន្តែដោយសារធ្វើតេស្តវិជ្ជមានកូវីដ-១៩ រូបគេមិនបានចូលលេងនៅពេលម៉ាឡេស៊ីឈ្នះឡាវ ៤-០ ឡើយ»។ នេះជាការបញ្ជាក់របស់លោក Cheng Hoe។
 

បើតាមការផ្សាយរបស់កាសែត CNA របស់សិង្ហបុរី ចំណោមសមាជិកក្រុមរបស់ម៉ាឡេស៊ី២៤រូប មានអ្នកឆ្លងកូវីដ-១៩ ចំនួន៤នាក់ហើយ។ មុនពេល Rashid និង Cheng មានអ្នកចាំទី Khairulazhan Khalid និងខ្សែបម្រើ Faisal Halim តេស្តវិជ្ជមានកាលពីសប្តាហ៍មុន។
 

ឆ្លងកាត់ការប្រកួត២លើកពូល B ម៉ាឡេស៊ី ឡើងឈរលើតារាងបណ្តោះអាសន្ន ក្រោយរកបានជ័យជម្នះទាំង២លើកជាប់គ្នា ក្នុងនោះឈ្នះកម្ពុជានៅជំនួបបើកឆាក ៣-១ មុនស៊ីឡាវ ៤-០។ ឥណ្ឌូណេស៊ី និង​វៀតណាម មាន៣ពិន្ទុ ក្រោយប្រកួតបាន១លើកដូចគ្នា ខណៈកម្ពុជា និងឡាវ ចាញ់២ប្រកួតដូចគ្នា៕