ភ្នំពេញ៖ លោក ប៉ិច បូឡែន ដែលជាអគ្គនាយកក្រុមហ៊ុន វេសឡាញ និងជាប្រធានសហព័ន្ធ សេវាអប់រំ និងជាអនុប្រធានប្រតិបត្តិ សមាគម YEAC បានសរសេរសារនៅលើទំព័រហ្វេសប៊ុករបស់ខ្លួន ដោយសូមឱ្យឈប់យកពាក្យ “គ្រូជោគជ័យ” ទៅនិយាយជាការលេងសើច និងចំអកដល់គ្រូបណ្ដុះបណ្ដាល គ្រូបង្វឹក អ្នកប្រឹក្សាយោបល់ ឬអ្នកចែករំលែកចំណេះដឹងផ្សេងៗជាដើម។
លោក ប៉ិច បូឡែន បានបញ្ជាក់ថា សាធារណជន គួរតែស្ដីបន្ទោសចំមុខ ឬចំឈ្មោះបុគ្គលណា ដែលចែករំលែកចំណេះក្នុងន័យកេងប្រវ័ញ្ច ឬបោកប្រាស់អ្នកដទៃ ដោយហៅពួកគេថាជា "គ្រូបោក" តែម្តងទៅ។ ក្នុងន័យនេះ លោក ប៉ិច បូឡែន ចង់សង្កត់ធ្ងន់ថា សាធារណជន មិនគួរពោលពាក្យ “គ្រូបោក” ទៅកាន់គ្រូបណ្ដុះបណ្ដាល គ្រូបង្វឹក អ្នកប្រឹក្សាយោបល់ ឬអ្នកចែករំលែកចំណេះដឹងទូទៅឡើយ។
ប្រធានសហព័ន្ធ សេវាអប់រំរូបនេះ ពន្យល់បន្ថែម៖«ប្រទេសយើងត្រូវការអភិវឌ្ឍន៍ធនធានចំណេះដឹងច្រើនទៀតណាស់។ យើងត្រូវការចែករំលែកចំណេះ ជំនាញគ្នា យើងត្រូវរៀនសូត្រថែមច្រើនណាស់។ នៅបណ្តាប្រទេសជឿនលឿនគេមានវគ្គសិក្សាជាច្រើនពាក់ព័ន្ធរឿងជោគជ័យនេះ តែគេមិនយកមកលេងសើចបែបនេះទេ។ និយាយឱ្យសមញ្ញ បើអ្នកណាចេញមកបោក ដោយគិតតែប្រយោជន៍ខ្លួនឯង ហៅអាពួកហ្នឹងថា "អាបោក" តែម្តងទៅ ហើយឈប់នាំគ្នាទៅរៀន ឬស្តាប់វា»។
អគ្គនាយកក្រុមហ៊ុន វេសឡាញ និងជាប្រធានសហព័ន្ធ សេវាអប់រំ និងជាអនុប្រធានប្រតិបត្តិ សមាគម YEAC លោក ប៉ិច បូឡែន បន្ថែមទៀតថា សាធារណជន គួរតែចេះថ្លឹងថ្លែងឱ្យឃើញថា បើបុគ្គលណាបង្រៀន ឬចែករំលែក ធ្វើឱ្យទទួលបានផល បានការរីកចម្រើន ពួកគេគួរតែបន្តគាំទ្របុគ្គលនោះបន្តទៀត។
ទោះជាយ៉ាងណា លោក បូឡែន ថាមុននឹងវាយតម្លៃគ្រូណាមួយ គេត្រូវត្រួតពិនិត្យផ្នត់គំនិត និងវិនិច្ឆ័យ ឱ្យឃើញថា តើគ្រូឬអ្នកបណ្តុះបណ្តាល ឬគ្រូបង្វឹកនោះមានក្រមសីលធម៌ មានបច្ចេកទេសត្រឹមត្រូវ មានទំនួលខុសត្រូវ និងមានគោលបំណងឈ្នះ-ឈ្នះ ដើម្បីបង្កើតប្រយោជន៍ជារួមឬទេ។
«នៅពេលយើងមិនចង់ស្តាប់ពីផ្នត់គំនិត និងរៀនសូត្រសកម្មភាពអ្នកមាន យើងនឹងអាចបន្តនៅក្រ។ បើយើងមិនព្រមរៀនសូត្រពីវិធីសាស្រ្តជោគជ័យក្នុងការអភិវឌ្ឍការងារ យើងនឹងនៅក្រិនមួយកន្លែង។ បើយើងមិនរៀនពីវិធីសាស្រ្តជោគជ័យក្នុងការរកស៊ី យើងនឹងមិនរីកចម្រើន។ បើយើងមិនរៀនសូត្រពីគន្លឹះ ឬគោលគំនិតកសាងគ្រួសារ ឬចិញ្ចឹមបីបាច់ថែរក្សាកូន យើងក៏អាចនឹងមានបញ្ហារកាំរកូសក្នុងគ្រួសារ»។ នេះជាការបញ្ជាក់របស់លោក ប៉ិច បូឡែន។
អគ្គនាយកក្រុមហ៊ុន វេសឡាញ និងជាប្រធានសហព័ន្ធ សេវាអប់រំ លោក បូឡែន សង្កត់ធ្ងន់ថា ការខំប្រឹងប្រែង ដើម្បីឱ្យខ្លួនរីកចម្រើនអាចធ្វើទៅបាន ប៉ុន្តែសំខាន់បំផុត កុំឱ្យការរីកចម្រើននោះ ធ្វើឱ្យអ្នកដទៃឈឺចាប់។
សូមរំលឹកជូនថា ចាប់តាំងពីមានគ្រូជោគជ័យមួយរូប ចេញមកនិយាយថា ខ្លួនបានជួយរកវិធីដោះស្រាយបំណុលយ៉ាងច្រើនសន្ធឹកសន្ធាប់ ជូនអ្នកនាង ស្រេង សុកាន់ដា ហៅ ខ្ញុង ដែលជាតារាកំប្លែង ដោយឱ្យនាងប្រកាសថាខ្លួនក្ស័យធន នឹងសុំឱ្យម្ចាស់បំណុលទាំងអស់ ទុកពេលឱ្យនាងរកប្រាក់ដោះបំណុលតាមសម្រួល បានធ្វើឱ្យមហាជនកម្ពុជាមួយចំនួន ចាប់ផ្ដើមយកពាក្យ”គ្រូជោគជ័យ”នេះ ទៅប្រើក្នុងន័យចំអក ហើយអ្នកខ្លះប្រើពាក្យ “គ្រូជោគជ័យ “ ថាជា “គ្រូបោក” ជាដើម។ ទោះជាយ៉ាងណាក៏ដោយ ការជួយរកដំណោះស្រាយឱ្យអ្នកនាង ខ្ញុង ដោយគ្រូជោគជ័យនោះ អ្នកនាងខ្ញុង ក៏ត្រូវបង់ប្រាក់មួយចំនួនធំ ទៅគ្រូជោគជ័យនោះដែរ ដើម្បីជាថ្នូរដូរយកដំណោះស្រាយ៕