ជាតិ
ពានរង្វាន់ព្រះនាងឥន្ទ្រទេវីឆ្នាំ២០២២ ចាប់ផ្ដើមបើកទទួលស្នាដៃហើយ រូបតំណាង (រូបផ្ដល់ឱ្យ)
× ភ្នំពេញ៖ ក្នុងគោលបំណងថែរក្សា លើកតម្កើង និងជំរុញវិស័យអក្សរសិល្ប៍ អក្សរសាស្ត្រជាតិ ឱ្យកាន់តែប្រសើរឡើងថែមទៀត ក្រសួងវប្បធម៌ និងវិចិត្រសិល្បៈ នឹងរៀបចំប្រឡងជ្រើសរើស ស្នាដៃតែងនិពន្ធប្រលោមលោកខ្នាតខ្លី និងកំណាព្យរឿង ពានរង្វាន់“ព្រះនាងឥន្ទ្រទេវី” ឆ្នាំ២០២២។
ដូចឆ្នាំមុនៗដែរ ប្រធានបទប្រឡងពានរង្វាន់ព្រះនាងឥន្ទ្រទេវី ឆ្នាំ២០២២ គឺ សេរី តែផ្ទៃរឿងទាំងមូលត្រូវតែមានលក្ខណៈសមស្រប ដោយត្រូវមានអត្ថន័យ (សច្ចធម៌ សីលធម៌ និងគុណធម៌) អត្ថរូប (វិធីតែង រចនាបថ និងសិល្ប៍សោភ័ណ) អត្ថរស (បង្ហាញឱ្យឃើញពីការអប់រំ ការអភិវឌ្ឍ និងការរក្សាតម្លៃអត្តសញ្ញាណជាតិ)។
អត្ថបទអក្សរសិល្ប៍ ដែលដាក់ទៅប្រកួតប្រជែង ត្រូវតែវាយដោយកុំព្យូទ័រ(Font យូនីកូត Khmer OS Siemreap ទំហំ១២ ខ្នាតក្រដាស A4 ចាប់ពី១៥-៣០ទំព័រ។ ចំពោះអក្ខរាវិរុទ្ធ យកតាមវចនានុក្រមខ្មែរ (សម្ដេចព្រះសង្ឃរាជ ជួន ណាត ជោតញ្ញាណោ) និងសេចក្ដីសម្រេចរបស់ក្រុមប្រឹក្សាជាតិភាសាខ្មែរ។
ជយលាភីលេខ១-៣ មានប្រលោមលោក៣រូប និងកំណាព្យរឿង៣រូប នឹងទទួលបានពានរង្វាន់១ អមដោយទឹកប្រាក់។ សម្រាប់រង្វាន់កិត្តិយសលេខ៤-៥ មានប្រលោមលោក២រូប និងកំណាព្យរឿង២រូប នឹងទទួលបានបណ្ណសរសើរ១ និងអមដោយទឹកប្រាក់។
សាធារណជន ដែលមានចំណាប់អារម្មណ៍ អាចដាក់ស្នាដៃរបស់ខ្លួន ចាប់ពីថ្ងៃជូនដំណឹងនេះ រហូតដល់ថ្ងៃទី៣០ ខែមិថុនា ឆ្នាំ២០២២ នៅវេលាម៉ោង១៧.០០នាទីជាកំហិត។
អាសយដ្ឋានទទួលស្នាដៃប្រឡង នៅនាយកដ្ឋានសៀវភៅ និងការអាន អគារលេខ៤៤ ផ្លូវសម្ដេចប៉ាន (លេខ២១៤) សង្កាត់បឹងរាំង ខណ្ឌដូនពេញ រាជធានីភ្នំពេញ នៅរៀងរាល់ម៉ោងធ្វើការ។ ឬផ្ញើតាមរយៈ Telegram លោក កុក រស់ ០១១ ៨៥០ ០៩៤ កញ្ញា ញ៉ឹក ថារី ០១២ ៨០១ ១២២ លោក សំអាត សិលា ០៧៨ ៦៦៨ ៩៧៧៕
Tag:
អក្សរសាស្ត្រ
អក្សរសិល្ប៍
ពានរង្វាន់
ព្រះនាងឥន្ទ្រទេវី
ស្នាដៃ
© រក្សាសិទ្ធិដោយ thmeythmey.com