ដោយ៖ សុង សុធាវី

 

 

«ដើម្បីធានានូវគុណភាពសំណង់ និង រចនាបថបែបខ្មែរ  ខ្ញុំបានបង្កើតក្រុមការងារសុទ្ធសឹងជាអ្នកជំនាញមានបទពិសោធច្បាស់លាស់ និងទាមទារគំនិតច្នៃប្រឌិតខ្ពស់  ហើយខ្ញុំផ្ទាល់តែងប្រយ័ត្នខ្លាំង ចំពោះការសាងសង់សមិទ្ធផលដ៏ធំ និងសំខាន់ចំពោះមុខនេះ។ គឺយើងត្រូវចុះសិក្សាលម្អិត ទាំងប្លង់អាគារ ទីតាំង តម្រូវការប្រើប្រាស់ លំហខ្យល់ សោភ័ណភាព និងតែងតែបញ្ចូលនូវលក្ខណៈវប្បធម៌ជាតិផងដែរ»។ ទាំងនេះជាការលើកឡើងរបស់ អ្នកស្រី កែវ ម៉ាលីកា អគ្គនាយិកាក្រុមហ៊ុន M Architect & Construction Co., Ltd. ក្នុងបទសម្ភាសន៍ជាមួយ សារព័ត៌មានថ្មីៗ ក្នុងកម្មវិធី «គំនិតថ្មី»។

 

អតីតនិស្សិតផ្នែកស្ថាបត្យកម្ម នៃសាកលវិទ្យាល័យន័រតុនរូបនេះ បានប្រាប់សារព័ត៌មានថ្មីៗ  ទាក់ទងនឹងអាគារទីស្តីការថ្មី ក្រសួងមហាផ្ទៃ ដែលត្រូវដំណើរការសាងសង់ឆាប់ៗនេះ នឹងបញ្ចប់ការសាងសង់នៅឆ្នាំ២០២៣ខាងមុ។ អ្នកស្រី កែវ ម៉ាលីកា លើកឡើងថា​ នេះជាសមិទ្ធផលធំជាងគេ បើធៀបនឹងស្នាដៃជាច្រើនកន្លងមក ដែលធ្លាប់ចេញប្លង់ ក្នុងនាមជាស្ថាបត្យករស្រ្តី។

 

ស្រ្តីវ័យ៤១ឆ្នាំ ដែលមានបទពិសោធជាង១០ឆ្នាំ ក្នុងវិស័យនេះ បានបង្ហាញឱ្យឃើញពីទម្រង់អាគារថ្មីនេះ ដូច្នេះ៖ «ចំពោះក្រសួងមហាផ្ទៃ ដែលជាស្ថាប័នរដ្ឋ ស័ក្ដិសមនឹងការរចនាប្លង់អាគារបែបក្លាសិក ព្រោះបង្ហាញពីភាពរឹងមាំ រក្សាទុកបានយូរ និងមានអំណាចថែមទៀតផង។ រីឯដំបូលវិញ យើងបន្ថែមរចនាបថ បែបខ្មែរគឺ «បុស្បុក» ដែលបង្ហាញពីភាពខ្ពង់ខ្ពស់ប្រសើរក្រៃលែង សម្រាប់បង្ហាញពីមុខមាត់ស្ថាប័ន ហើយរឹតពិសេស  គឺពិតជាស័ក្ដិសមចំពោះថ្នាក់ដឹកនាំប្រទេសថែមទៀតផង។ ប៉ុន្តែទម្រាំសម្រេចចេញនូវប្លង់អាគារនេះ គឺមានការផ្លាស់ប្តូរយោបល់ និងមានការផ្តល់ជាគំនិតពីថ្នាក់ដឹកនាំនៃក្រសួងមហាផ្ទៃផងដែរ»។

 

ទម្រាំមកដល់ចំណុចនេះ អ្នកស្រី កែវ ម៉ាលីកា តែង​មានភាព​អំណត់ព្យាយាម ដោយ​ហ៊ាន​បញ្ចេញ​នូវ​គំនិត​យោបល់ ការច្នៃប្រឌិត ដើម្បី​បង្កើតអ្វីដែលថ្មីជារបស់​ខ្លួនឯង។ អ្នកស្រី កែវ ម៉ាលីកា បន្ថែមថា៖ «ក្នុងមួយជីវិតស្ថាបត្យករ បើចង់ចេញប្លង់អាគារធំៗបាន ត្រូវចាប់ផ្តើមធ្វើរឿងពីតូចទៅ ហើយដាក់ចិត្តទទួលថា នឹងមានមតិបដិសេធ ការកែប្រែជាច្រើនលើកច្រើនសារ ទម្រាំតែស្នាដៃយើង មានការទទួលស្គាល់ទូលំទូលាយ»៕