កីឡាអន្តរជាតិ
អន្តរជាតិ
New York City ដែលមានម្ចាស់រួមជាមួយ Man City លើកពាន MLS Cup លើកដំបូង
× New York City FC បានយកឈ្នះ Portland Timbers ៤-២ ដោយការទាត់ប៉េណាល់ទី ដើម្បីលើកពាន MLS Cup នៅអាម៉េរិក ជាលើកដំបូងក្នុងប្រវត្តិសាស្ត្រខ្លួន។ ក្លិបអាជីពមួយនេះ គ្រប់គ្រងដោយ City Football Group ដូច Manchester City នៃក្របខណ្ឌ English Premier League ផងដែរ។
នាជំនួបនៅកីឡដ្ឋាន Providence Park ខ្សែប្រយុទ្ធអាហ្សង់ទីន Valentín Castellanos តែតបាល់បញ្ចូលទីនាំមុខនៅនាទី៤១ សម្រាប់ New York City ប៉ុន្តែខ្សែប្រយុទ្ធស៊ីលី Felipe Mora វាយបកតាមស្មើវិញនាទីបន្ថែមទី៥មុនបញ្ចប់ការប្រកួត។
ឈានដល់ការកាត់ក្តីដោយបាល់ប៉េណាល់ទី New York City FC សម្រេចបាន៤គ្រាប់ រីឯ Portland Timbers ដែលជាម្ចាស់ផ្ទះ និងជាជើងឯកឆ្នាំ២០១៥ រកបានតែ២គ្រាប់ប៉ុណ្ណោះ ដែលនាំឲ្យក្រុមដឹកនាំដោយគ្រូបង្វឹកវេណេស៊ុយអេឡា Giovanni Savarese ឈ្នះពាន MLS Cup ជាលើកដំបូង។
New York City FC បានក្លាយជាសមាជិកក្នុងក្របខណ្ឌ Major League Soccer របស់អាម៉េរិក នាឆ្នាំ២០១៣ បន្ទាប់ក្លិប Manchester City យល់ព្រមលើកិច្ចព្រមព្រៀងដៃគូជាមួយក្លិបបេស្បល New York Yankees។
ចាប់តាំងពីលេងនៅរដូវកាល MLS ដំបូងនាឆ្នាំ២០៥ ក្លិបមួយនេះ បានចុះហត្ថលេខានាំយកកីឡាករល្បីៗមួយចំនួនដូចជាអតីតខ្សែប្រយុទ្ធអេស្ប៉ាញ David Villa វីរបុរសអ៊ីតាលី Andrea Pirlo និងអតីតខ្សែបម្រើអង់គ្លេស Frank Lampard ជាដើម៕
© រក្សាសិទ្ធិដោយ thmeythmey.com