លោក ថង សាវុន អភិបាលខេត្តមណ្ឌលគិរី ជំរុញឱ្យមន្រ្តីខ្លួនរៀបចំសោភណ្ឌភាព កាត់ស្មៅ សម្អាតបរិស្ថាន ស្តារកន្លែងខូចខាត និងហេដ្ឋារចនាសម្ព័ន្ធឡើងវិញ នៅទីតាំងព្រៃស្រល់ក្នុងក្រុងសែនមនោរម្យ ព្រោះជាកន្លែងពេញនិយមមួយសម្រាប់អ្នកដំណើរឆ្លងកាត់ចេញចូលខេត្ត។ 

 

អភិបាលខេត្តរូបនេះបញ្ជាក់ថា ការរៀបចំទីតាំងនេះ ដើម្បីបង្កើនភាពទាក់ទាញភ្ញៀវទេសចរ ដែលមកកម្សាន្តនៅខេត្តមណ្ឌលគិរី ហើយទទួលបានអារម្មណ៍ស្រស់ស្អាតជាមួយនឹងទេសភាពស្អាតៗ និងបរិស្ថានល្អ។
 

«យើងគ្រាន់តែរៀបចំឡើងវិញឱ្យស្អាត សម្អាតស្មៅ ផ្លូវចូល ហើយស្ដារកន្លែងខូចខាតមួយចំនួន ដើម្បីឱ្យភ្ញៀវទេសចរស្រួលមកពិចនិច ថតរូបអ៊ីចឹងទៅ កន្លែងគេឆ្លងកាត់ចេញចូលខេត្តហ្នឹង»។ នេះជាការលើកឡើងរបស់លោកអភិបាលខេត្តមណ្ឌលគិរី ដោយបន្តថា ខេត្តគ្មានគម្រោងអភិវឌ្ឍតំបន់នោះឡើយ ប៉ុន្តែរៀបចំសោភណ្ឌភាពឱ្យរៀបរយ និងបន្ថែមធុងសំរាមនៅទីតាំងនោះជាដើម។

 

ជាមួយគ្នានេះ លោក ថង សាវុន អភិបាលខេត្តមណ្ឌលគិរី ក៏អំពាវនាវដល់ភ្ញៀវទេសចរ ដែលមកកម្សាន្តនៅខេត្តមណ្ឌលគិរី មិនថាព្រៃស្រល់ ឬទីតាំងទេសចរណ៍ណាមួយទេ ឱ្យចូលរួមសម្អាតបរិស្ថាន និងទុកដាក់សំរាមឱ្យបានត្រឹមត្រូវផងដែរ៕