អន្តរជាតិ
លោកពូទីន៖ រុស្ស៊ីជាអ្នកនាំមុខគេលើពិភពលោកលើបច្ចេកវិទ្យាមីស៊ីលល្បឿនលឿនជាងសំឡេង ប្រធានាធិបតីរុស្ស៊ី វ៉្លាំឌីមៀ ពូទីន ។ រូបថតពីវេបសាយប្រធានាធិបតីរុស្ស៊ី
× រុស្ស៊ីជាអ្នកនាំមុខគេលើពិភពលោកចំពោះបច្ចេកវិទ្យាមីស៊ីលល្បឿនលឿនជាសំឡេង។ ប្រធានាធិបតីរុស្ស៊ី វ៉្លាឌីមៀ ពូទីន អះអាងបែបនេះក្នុងឯកសារវីដេអូមួយដែលចាក់ផ្សាយនៅថ្ងៃទី១២ខែធ្នូ។ លោក ពូទីន ថែមទាំងលើកឡើងថា នៅពេលអនាគតដែលប្រទេសផ្សេងៗអាចតាមទាន់រុស្ស៊ីនោះ រុស្ស៊ីក៏អាចនឹងមានបច្ចេកវិទ្យាដើម្បីទប់ទល់នឹងអាវុធទាំងនោះរួចទៅហើយដែរ។
រុស្ស៊ី និងអាម៉េរិក ស្មើគ្នាបើនិយាយពីចំនួនមីស៊ីល។ ប៉ុន្ដែក្នុងការអភិវឌ្ឍបច្ចេកវិទ្យាមីស៊ីល ឬអាវុធលឿនជាងសំឡេងវិញ ច្បាស់ណាស់រុស្ស៊ីជាអ្នកនាំមុខគេ។ ប្រធានាធិបតីរុស្ស៊ី វ៉ា្លឌីមៀ ពូទីន លើកឡើងបែបនេះក្នុងឯកសារវីដេអូមួយដែលមានចំណងជើងថា «ប្រវត្តិសាស្ត្រថ្មីរបស់រុស្ស៊ី» ដែលចាក់ផ្សាយនៅថ្ងៃទី១២ ខែធ្នូ។ ប្រធានាធិបតីរូបនេះ ទទួលស្គាល់ដែរថា ថ្ងៃខាងមុខ មហាអំណាចផ្សេងទៀត ក៏អាចតាមទាន់បច្ចេកវិទ្យាមីស៊ីលល្បឿនលឿនជាងសំឡេងដែលរុស្ស៊ីកំពុងមាន ផងដែរ។
«ខណៈដែលពួកគេទទួលបានអាវុធនេះ ពួកយើងទំនង ជាមានមធ្យោបាយក្នុងការប្រឆាំងនឹងអាវុធទាំងនោះហើយ»។ ប្រមុខរដ្ឋរុស្ស៊ីបន្ថែមបែបនេះក្នុងន័យលើកតម្កើងសមត្ថភាពរបស់រុស្ស៊ីក្នុងការអភិវឌ្ឍបច្ចេកវិទ្យាអាវុធរបស់ខ្លួន។
កាលពីដើមខែវិច្ឆិកា មេដឹកនាំរុស្ស៊ីរូបនេះធ្លាប់បានអះអាងថា ការសាកល្បងមីស៊ីល ល្បឿនលឿនជាងសំឡេង Zircon ទទួលបានជោគជ័យនឹងជិតចប់សព្វគ្រប់ហើយ។ បន្ថែមពីនេះ មីស៊ីលនេះនឹងត្រូវចាប់ផ្ដើមដាក់ពង្រាយនៅកងទ័ពជើងទឹកក្នុងឆ្នាំ២០២២ ខាងមុខ។
ជុំវិញរឿងបច្ចេកវិទ្យាអាវុធរបស់រុស្ស៊ី អ្នកជំនាញលោកខាងលិចមួយចំនួនកំពុងតែសិក្សា ថា អាវុធជំនាន់ថ្មីរបស់រុស្ស៊ីមានភាពជឿនលឿនកម្រិតណា។ ស្របពេលជាមួយគ្នានេះ ពួកគេក៏ទទួលស្គាល់ថា ការរួមបញ្ចូលគ្នានៃល្បឿន ភាពបត់បែន និងរយៈកម្ពស់នៃមីស៊ីលល្បឿនលឿនជាងសំឡេងរបស់រុស្ស៊ី នឹងធ្វើឱ្យពិបាកក្នុងការតាមដាន និងស្ទាក់ចាប់ការវាយប្រហារដោយមីស៊ីលប្រភេទនោះ។
យោងតាមទិន្នន័យធនាគារពិភពលោក ការចំណាយលើផ្នែកយោធារបស់ទីក្រុងមូស្គូទាបជាងការចំណាយរបស់ទីក្រុងវ៉ាស៊ីនតោន។ ក្នុងឆ្នាំ២០២០ រុស្ស៊ីចំណាយត្រឹមតែ៦២ពាន់លានដុល្លារ ខណៈអាម៉េរិកចំណាយអស់៧៧៨ពាន់លានដុល្លារ។ មហាអំណាចពិភពលោកទាំងពីរខាងលើរួមទាំងចិន ដែលកំពុងអភិវឌ្ឍបច្ចេកវិទ្យាអាវុធរបស់ខ្លួន កំពុងតែរត់ប្រណាំងសព្វាវុធឱ្យជឿនលឿនបន្ថែមទៀត៕
Tag:
រុស្ស៊ី
វ៉្លាឌីមៀ ពូទីន
© រក្សាសិទ្ធិដោយ thmeythmey.com