ក្រុមដែលមកពីតំបន់ Catalonia ក៏ទើបតែធ្លាក់ចេញពី UEFA Champions League ត្រឹមវគ្គចែកពូលកាលពីថ្ងៃទី៧ខែធ្នូ ហើយវាជាលើកដំបូងក្នុងរយៈពេល១៧ឆ្នាំដែល Barcelona មិនបានឆ្លងទៅកាន់វគ្គខ្វែងនៃពានរង្វាន់លំដាប់ទី១នេះ។ នាជំនួបទល់ Osasuna ដែលបញ្ចប់លទ្ធផល២-២ កីឡាករវ័យក្មេង៣រូប រួមមាន Gavi, Nico Gonzalez និង Abdessamad Ezzalzoili បានធ្វើឱ្យ Xavi ចាប់អារម្មណ៍ជាខ្លាំងដោយពួកគេបានបង្ហាញទម្រង់លេងល្អ និងការប្រឹងប្រែងរកជ័យជម្នះ។

 

«Abde, Gavi និង Nico ពិតជាប្លែកខុសពីធម្មតាខ្លាំងណាស់ ពួកគេកំពុងតែជួយពង្រឹងក្រុមក្នុងគ្រាដែលក្រុមជួបការលំបាកបែបនេះ។ កីឡាករក្មេងៗតែងបង្កើតភាពប្លែកៗខុសគ្នារាល់ការប្រកួត ប៉ុន្តែភាពវិជ្ជមាននិងអវិជ្ជមានតែងតែមានព្រោះពួកគេនៅក្មេង ឯទម្រង់លេង ប្រួលប្រែរហូត។» Xavi និយាយបែបនេះក្នុងសន្និសីទព័ត៌មានក្រោយចប់ការប្រកួត។
 

បើទោះជាលើកសរសើពីកីឡាករវ័យក្មេងយ៉ាងនេះក្តី ប៉ុន្តែ Xavi អះអាងថា ក្រុមលោកកំពុងតែស្ថិតក្នុងស្ថានភាពមួយលំបាកនៅឡើយ។
 

«កីឡាករវ័យក្មេងៗ បើពឹងតែលើពួកគេគឺមិនអាចពង្រឹងក្រុមឱ្យខ្លាំងឡើយ។ កីឡាករផ្សេងទៀតក៏ត្រូវតែខិតខំធ្វើការងាររបស់ខ្លួនដូចគ្នា ហើយយើងគួរតែមានក្តីរំពឹងលើក្រុមទាំងមូល។ ការបាត់បង់ពិន្ទុជារឿងដែលពិបាកទទួលយកខ្លាំងណាស់ ហើយនេះជារសជាតិដល់សែនឈឺចាប់បំផុតមួយ។» អ្នកចាត់ការវ័យ៤១ឆ្នាំ បន្តបែបនេះ។

 

Barcelona ពេលបច្ចុប្បន្ន កំពុងតែស្ថិតនៅចំណាត់ថ្នាក់លេខ៨ ដោយមាន ២៤ពិន្ទុ ហើយមាន គម្លាតពិន្ទុពីក្រុមកំពូលតារាង Real Madrid រហូតដល់ទៅ ១៨ពិន្ទុឯណ្ណោះ គិតត្រឹមប្រកួតសប្តាហ៍ទី ១៦៕