ដំបូងឡើយក្លិប PSG ត្រូវជួបក្រុមបិសាចក្រហម Manchester United នៅវគ្គ១៦ក្រុម ប៉ុន្តែការចាប់ឆ្នោតត្រូវបានធ្វើឡើងវិញដោយសារតែមានបញ្ហាបច្ចេកទេស។ បន្ទាប់ពីចាប់ឆ្នោតលើកទី២រួច PSG បានប្តូរទៅជួបក្រុមអធិរាជស​ Real Madrid វិញ ឯបិសាចក្រហម ជួប Atletico Madrid។ 

 

ខ្សែការពារ Ramos បង្ហាញចំណាប់អារម្មណ៍ទាក់ទងនឹងលទ្ធផលចាប់គូនេះ ហើយប្ដេជ្ញាលេងឱ្យបានល្អសម្រាប់ក្លិបបច្ចុប្បន្នរបស់ខ្លួន។

 

«ពេលខ្ញុំនៅលើយន្តហោះខ្ញុំបានឮថា Manchester United បានចាប់គូទល់ PSG ។ នេះគឺជាក្រុមដែលខ្ញុំពេញចិត្តប្រកួតជាមួយប៉ុន្តែវាត្រូវបានផ្លាស់ប្តូរវិញ។ ខ្ញុំអាចនិយាយបានថា មិនចង់លេងតទល់ជាមួយ Real Madrid ឡើយ ប៉ុន្តែខ្ញុំពេញចិត្តក្នុងការត្រលប់ទៅកាន់ផ្ទះចាស់ Bernabeu ម្តងទៀត។» Ramos ប្រាប់អ្នកកាសែតបែបនេះ។
 

ទោះបីជារូបគេមិនចង់ប្រកួតតទល់ជាមួយក្លិបចាស់អធិរាជស Real Madrid ក្តីតែ Ramos អះអាងរូបគេនឹងការពារក្រុម PSG រហូតឆ្លងទៅកាន់វគ្គបន្ទាប់។ 

 

«អ្នកគ្រប់គ្នាគួរតែដឹងថាខ្ញុំស្រលាញ់ Real Madrid ខ្លាំងប៉ុណ្ណា។ ប៉ុន្តែពេលនេះខ្ញុំត្រូវការពារ PSG នឹងត្រូវធ្វើអ្វីគ្រប់យ៉ាងដើម្បីបន្តដំណើរទៅវគ្គបន្ត ហើយខ្ញុំក៏ប្រយុទ្ធដល់ទីបញ្ចប់បើទោះជាត្រូវស្លាប់ក៏ដើម្បី PSG ដែរ។»ខ្សែការពារវ័យ ៣៥ឆ្នាំបានបន្ថែម៕