អន្តរជាតិ
វៀតណាម កាត់ទោសអតីតប្រធានគណៈកម្មាធិការក្រុងហាណូយជាប់គុក៨ឆ្នាំពីបទបំពានអំណាច អតីតប្រធានគណៈកម្មាធីការប្រជាជនទីក្រុងហាណូយ Nguyen Duc Chung ។ រូបថត AFP
× តុលាការវៀតណាមនៅថ្ងៃទី១៣ ខែធ្នូ បានសម្រេចដាក់ពន្ធនាគារលោក Nguyen Duc Chung ជាអតីតប្រធានគណៈកម្មាធិការប្រជាជនទីក្រុងហាណូយចំនួន៨ឆ្នាំបន្ថែមទៀតពីបទប្រើប្រាស់អំណាចខុសច្បាប់។
យោងតាមប្រព័ន្ធផ្សព្វផ្សាយរដ្ឋចេញផ្សាយថ្ងៃទី១៣ ខែធ្នូ លោក Nguyen Duc Chung អាយុ ៥៤ ឆ្នាំ ត្រូវបានកាត់ទោសជាលើកទីពីរពីបទលួចប្រាក់៣៦ពាន់លានដុង ដែលស្មើនឹង១,៥៧លានដុល្លារពីគម្រោងវិនិយោគសាធារណៈមួយ។ លោក Chung បានប្រើប្រាស់ប្រាក់ទាំងនោះទៅជួយក្រុមហ៊ុនមួយដែលគ្រប់គ្រងដោយគ្រួសាររបស់លោក។
កាលពីឆ្នាំ២០២០ លោក Chung ត្រូវបានកាត់ទោសឱ្យជាប់ពន្ធនាគាររយៈពេល៥ឆ្នាំរួចមកហើយជុំវិញការក្លែងបន្លំឯកសាររដ្ឋសម្ងាត់ និងប្រើប្រាស់ទ្រព្យសម្បត្តិខុសច្បាប់ដែលបណ្តាលឱ្យខាតបង់ថវិការដ្ឋជាង៤០លានដុល្លារ។ យ៉ាងណាមិញ មេធាវីរបស់លោក Chung បានបដិសេធក្នុងការបកស្រាយបន្ថែមជុំវិញរឿងនេះ។
គួរបញ្ជាក់ថា បក្សកុម្មុយនីស្តវៀតណាមដែលកំពុងកាន់អំណាច បានបង្កើនការប្រយុទ្ធ ប្រឆាំងនឹងអំពើពុករលួយនៅជួររដ្ឋាភិបាលដើម្បីពង្រឹងអំណាចបក្សរបស់ខ្លួន។ បក្សទាំងតូចទាំងធំ ត្រូវបានកាត់ទោសជាបន្តបន្ទាប់ ពិសេសករណីពុករលួយ៕
© រក្សាសិទ្ធិដោយ thmeythmey.com