ប្លែកៗ
អន្តរជាតិ
អារ៉ាប៊ីសាអូឌីតដកសិទ្ធិសត្វអូដ្ឋ៤៣ក្បាលពី «Miss Camel» ដោយសារតែការកែសម្ផស្ស
×![]()
ដោយ: ធីតា
រឿងអាស្រូវមួយបានកើតឡើងក្នុងកម្មវិធីប្រកួតសម្ផស្សសត្វអូដ្ឋ «Miss Camel» នៅអារ៉ាប៊ីសាអូឌីត នាពិធីបុណ្យប្រចាំឆ្នាំរំលឹកដល់ព្រះមហាក្សត្រ Abdelaziz។ យោងតាមការផ្សាយរបស់ទីភ្នាក់ងារព័ត៌មាន SPA អូដ្ឋ៤៣ក្បាលដែលចូលរួមប្រកួតប្រជែង ត្រូវបានរកឃើញថា មានចាក់សារធាតុកែសម្ផស្ស Botox។
ឆ្លងការត្រួតពិនិត្យសរីរាង្គ និងផ្នែកវេជ្ជសាស្ត្រ ជាពិសេសតាមរយៈកាំរស្មីអ៊ិច គណៈកម្មការរៀបចំការប្រកួត «Miss Camel» បានរកឃើញថា សត្វអូដ្ឋចំនួន៤៣ក្បាល បានធ្វើខុសលក្ខន្តិកៈ និងក្លែងបន្លំ ដោយបានចាក់សាធាតុកែសម្ផស្ស Botox ដើម្បីយកឈ្នះគូប្រជែងផ្សេងទៀត។
ជាពិធីបុណ្យប្រចាំឆ្នាំដែលឧទ្ទិសដល់ព្រះមហាក្សត្រអារ៉ាប៊ីសាអូឌីត Abdelaziz កម្មវិធីនេះ ទាក់ទាញអ្នកចិញ្ចឹមសត្វអូដ្ឋជាច្រើននាក់ពីតំបន់ឈូងសមុទ្រពែក្ស នាំសត្វអូដ្ឋរបស់ខ្លួនសម្រាប់ការប្រកួតប្រជែង ដោយប្រាក់រង្វាន់សរុបមានរហូតដល់ទៅ៦៦លានដុល្លារអាម៉េរិកឯណោះ។
សម្រាប់ការប្រកួតប្រជែង គណៈកម្មការវិនិច្ឆ័យលើរូបរាង ទំហំនៃបបូរមាត់ ក បូក និងកំប៉េះគូទ។ ការប្រកួតប្រជែងត្រូវបន្តដំណើរការរហូតដល់ពាក់កណ្តាលខែមករា ឆ្នាំ២០២២ ខាងមុខ ដែលរៀបចំនៅតំបន់វាលខ្សាច់ភាគឦសាននៃក្រុងរីយ៉ាដ។
ការក្លែងបន្លំបែបនេះ មិនមែនជាលើកទី១នោះឡើយ ដោយកាលពីឆ្នាំ២០១៤ គណៈកម្មការរៀបចំការប្រកួតក៏បានរកឃើញសត្វអូដ្ឋ១៤ក្បាល ត្រូវបានចាក់ថ្នាំកែសម្ផស្ស ផងដែរ។
តំណាងអ្នករៀបចំកម្មវិធីម្នាក់ បានបញ្ជាក់ថា គោលបំណងដ៏សំខាន់នោះ គឺសត្វអូដ្ឋដែលចូលរួមប្រកួតប្រជែងត្រូវមានសម្រស់ពីធម្មជាតិ ដោយការវះកាត់កែសម្ផស្ស បានបង្ហាញពីការចិញ្ចឹមសត្វមិនបានត្រឹមត្រូវ និងខ្វះការពិចារណា។
«ម្ចាស់អូដ្ឋដែលបានប្រព្រឹត្តទង្វើបែបនេះ ត្រូវប្រឈមនឹងការពិនិត្យយ៉ាងធ្ងន់ធ្ងរ ហើយពួកគេគ្មានសិទ្ធិនាំសត្វអូដ្ឋឲ្យចូលរួមសម្រាប់ការប្រកួតក្រោយៗនោះឡើយ»។ លោកបានអះអាងយ៉ាងដូច្នេះ៕
© រក្សាសិទ្ធិដោយ thmeythmey.com
«ប្រទានកម្ម»មានន័យដូចម្តេច?
6 ម៉ោង
