«សុំកុំរំខានខ្ញុំទុកពេលវេលាឱ្យខ្ញុំធ្វើ(ជួបមេដឹកនាំមីយ៉ាន់ម៉ា) ខ្ញុំមិនមែនជាគ្រូអស់លោកអ្នកទេ ហើយអស់លោកអ្នក ក៏មិនមែនជាគ្រូខ្ញុំដែរ»។ នេះជាការលើកឡើងរបស់សម្ដេច ហ៊ុន សែន ដែលនៅតែប្រកាសពីជំហរទៅជួបលោក មីន អ៊ុងឡាំង មេដឹកនាំរបបយោធាមីយ៉ាន់ម៉ា នៅដើមខែមករា ឆ្នាំ២០២២។
 

ថ្លែងក្នុងពិធីសម្ពោធដាក់ឱ្យប្រើប្រាស់ សណ្ឋាគារ «ហៃយ៉ាត់ រីជិនស៊ី ភ្នំពេញ» នៅថ្ងៃទី១៥ ធ្នូ សម្ដេច ហ៊ុន សែន បានបញ្ជាក់ថា សម្ដេចនឹងសាកល្បងយកបទពិសោធន៍ដោះស្រាយបញ្ហាជម្លោះនៅកម្ពុជា ទៅដោះស្រាយបញ្ហានៅមីយ៉ាន់ម៉ា តាមរយៈការជួបពិភាក្សាគ្នាជាមួយលោក មីន អ៊ុងឡាំង។ ដូច្នេះការដោះស្រាយបញ្ហានៅមីយ៉ាន់ម៉ាជោគជ័យ ឬមិនជោគជ័យ ក៏មិនត្រូវបន្ទោសកម្ពុជាដែរ។
 

មូលហេតុដែលសម្ដេច ព្យាយាមជួបមេដឹកនាំរបបយោធាមីយ៉ាន់ម៉ានេះ ក្រោមហេតុផលថា សម្ដេចមិនចង់ឱ្យសមាជិកអាស៊ានទាំងអស់បែកបាក់គ្នា ខណៈដែលកិច្ចប្រជុំអាស៊ានកន្លងមក មានតែសមាជិក៩ប្រទេស ដោយអវត្តមានមីយ៉ាន់ម៉ា ព្រោះតែមិនគោរពគោលការណ៍៥ចំណុចរបស់អាស៊ាន។ បើតាមបំណងរបស់សម្ដេច ហ៊ុន សែន គឺចង់ឱ្យអាស៊ានវិលត្រឡប់មករូបភាពដូចដើម នៅក្នុងកិច្ចប្រជុំអាស៊ាន២០២២ ដែលកម្ពុជាធ្វើជាម្ចាស់ផ្ទះ។