ក្រុម Real Madrid លេខ១ក្នុងកំពូលតារាង La Liga ត្រូវបន្តដំណើរប្រកួត Champions League របស់ខ្លួនទល់ក្រុមអ្នកមានបារាំង Paris Saint Germain ក្រោយការចាប់ឆ្នោតលើកទី២នៃពានរង្វាន់អឺរ៉ុបមួយនេះនៅថ្ងៃទី១៣ខែធ្នូ។ ខ្សែប្រយុទ្ធឆ្នើម Lionel Messi អះអាងថា PSG ពិតជាចង់ឈ្នះពាននេះ។
 

«អ្វីដែលសំខាន់សម្រាប់ PSG គឺត្រូវឈ្នះ Champions League ។ នេះជាអ្វីដែលអ្នកគ្រប់គ្នាចង់បាន ហើយក្រុមក៏ធ្លាប់បានខិតជិតក្នុងការកាន់ពានរង្វាន់នេះពីមុន។ ការប្រកួតវគ្គបន្ទាប់ពិតជា ប្រកួតសំខាន់ខ្លាំងណាស់សម្រាប់ក្រុម។ យើងត្រូវតែព្យាយាមដើម្បីឈ្នះវា។» Messi និយាយប្រាប់ Marca នៅក្នុងកម្មវិធី Dubai Expo 2020។

 

ខ្សែប្រយុទ្ធវ័យ៣៤ឆ្នាំរូបនេះចាកចេញពីក្លិប Barcelona កាលពីខែមិថុនាមកចូលរួមជាមួយ PSG ។ Messi អះអាងថា ប្រកួតទល់អតីតក្រុមគូប្រជែងនៅ UCL គឺជារឿងមិនងាយស្រួលឡើយ។
 

«វាពិតការផ្លាស់ប្តូរដ៏ធំមួយ។ បន្ទាប់ពីខ្ញុំបានរស់នៅទីនោះ (Barca) ខ្ញុំដឹងច្បាស់ណាស់ ដូច្នេះវាមិនងាយស្រួលឡើយពេលប៉ះពួកគេ។ ប៉ុន្តែពេលនេះយើងកំពុងធ្វើការបានយ៉ាងល្អជាមួយក្រុមដល់ល្អបំផុតមួយក្នុងពិភពលោកនិងទីក្រុងដ៏ស្រស់ស្អាតនៅពេលនេះ។» Messi បានបន្ថែមបែបនេះ។
 

រដូវកាល ២០១៩-២០ PSG ធ្លាប់បានឈានជើងចូលទៅកាន់វគ្គផ្តាច់ព្រ័ត្រ Champions League លើកដំបូងក្នុងប្រវត្តិសាស្រ្តក្លិបដោយកាលនោះស្ថិតក្រោមការដឹកនាំរបស់លោក Thomas Tuchel។ ២០២០-២០២១ PSG ធ្លាក់ត្រឹមវគ្គពាក់កណ្តាលផ្តាច់ព្រ័ត្រក្រោមថ្វីជើងក្រុម ​Manchester City៕