កម្ពុជា និងឡាវ ជាក្រុម​ដែលធ្លាប់ឈ្នះចាញ់គ្នា​នៅក្នុងព្រឹត្តិការណ៍​បាល់ទាត់ថ្នាក់តំបន់នេះ ដោយ​ឡាវធ្លាប់បានឈ្នះ ១-០ នៅ​ឆ្នាំ​១៩៩៦ និង​២-១ នៅ​ឆ្នាំ​២០០៤ រីឯកម្ពុជាវិញ ក៏បានឈ្នះឡាវ ៣-០ នៅ​ឆ្នាំ២០០០ និង​ ៣-១ នៅ​ឆ្នាំ​២០១៨ ផងដែរ។

 

កម្ពុជា បានចាញ់ម៉ាឡេស៊ី ៣-១ និង ឥណ្ឌូណេស៊ី ៤-២ នាការប្រកួតក្នុងពូលពីរលើកកន្លងមក ប៉ុន្តែជាមួយនឹងការគ្រប់គ្រងបាល់ច្រើនជាង។ លោក Keisuke Honda អ្នកចាត់ការទូទៅក្រុមជម្រើសជាតិ​កម្ពុជា បាន​លើកឡើងថា គ្មានលេស​អ្វីឡើយ​ទាក់ទងនឹងបរាជ័យ ប៉ុន្តែកម្ពុជាកំពុង​បោះជំហានទៅមុខ។

 

រីឯឡាវ ជំនួបថ្ងៃនេះ ជាការប្រកួតបង្គ្រប់កិច្ច ដោយពួក​គេបានហាលអាវ​ដោយស្វ័យ​ប្រវត្តិទៅ​ហើយ ក្រោយ​ចាញ់វៀតណាម ២-០ ចាញ់ម៉ាឡេស៊ី ៤-០ និងចាញ់​ឥណ្ឌូណេស៊ី ៥-១ ។

 

នាការប៉ះគ្នា​ចុងក្រោយក្នុង AFF Suzuki Cup កាលពី​ឆ្នាំ២០១៨ ចាន់​ វឌ្ឍនាកា, ប្រាក់ មុន្នីឧត្តម និងកែវ សុខផេង បានស៊ុតបាល់បញ្ចូលទីម្នាក់១គ្រាប់ក្នុងជ័យជម្នះ ៣-១ លើ​ឡាវ។ កាលណោះ ខ្សែបម្រើ សុះ ស៊ូហាណា ជាប់ជាកីឡាករឆ្នើម​ប្រចាំការប្រកួត រីឯកីឡាករផ្សេងទៀត ដែលលេងបានចូលលេងរួមមាន សេត រ៉ស៊ីប, សារ៉េត គ្រីយ៉ា និងឆេង ម៉េង៕