សម្ដេច ហ៊ុន សែន តែងតាំងលោក ប្រាក់ សុខុន ជាបេសកជនដោះស្រាយបញ្ហានៅមីយ៉ាន់ម៉ា។ សម្ដេចថ្លែងបែបនេះ នៅក្នុងពិធីសម្ពោធដាក់ឱ្យប្រើប្រាស់ សណ្ឋាគារ «ហៃយ៉ាត់ រីជិនស៊ី ភ្នំពេញ» នៅថ្ងៃទី១៥ ធ្នូ ។
នាយករដ្ឋមន្រ្តី ហ៊ុន សែន នៅតែរក្សាជំហរដោះស្រាយបញ្ហាវិបត្តិមីយ៉ាន់ម៉ា ។ សម្ដេច ក៏បានបញ្ជាក់ថា គ្មានអ្នកណាម្នាក់អាចបង្អាក់បំណងរបស់សម្ដេចបានឡើយ។ បន្ថែមពីនេះ សម្ដេច ក៏បានប្រកាសតែងតាំងលោក ប្រាក់ សុខុន ជាប្រេសិតអាស៊ាន ដើម្បីដោះស្រាយបញ្ហាមីយ៉ាន់ម៉ា។
«ខ្ញុំសូមបញ្ជាក់ថា បេសកជន! ខ្ញុំនឹងតែងតាំងឯកឧត្តម ប្រាក់ សុខុន ធ្វើជាបេសកជន ។ ក្នុងនោះ ខ្ញុំក៏បានត្រៀមអ្នកជួយការងារ ឲ្យឯកឧត្តម ប្រាក់ សុខុន គឺឯកឧត្តម ចម ប្រសិទ្ធិ ដែលជាមនុស្សម្នាក់ ដើរជាប់ជាមួយខ្ញុំ ចរចារហូតបញ្ចប់ដំណាក់កាលនេះ»។ នេះជាការបញ្ជាក់របស់ប្រមុខរដ្ឋាភិបាល។
សម្ដេច ហ៊ុន សែន ប្រាប់ឱ្យមេដឹកនាំអាស៊ាន និងបណ្ដាអន្តរជាតិ កុំបន្ទោសកម្ពុជា ក្នុងការបង្កើនទំនាក់ទំនង និងចូលខ្លួនទៅដោះស្រាយបញ្ហាមីយ៉ាន់ម៉ា ។ សម្ដេច ហ៊ុន សែន ថ្លែងបែបនេះ ក្រោយពីបណ្ដាសមាជិកអាស៊ាន និងអន្តរជាតិផ្សេងទៀត កំពុងដាក់សម្ពាធលើរបបដឹកនាំយោធាលើមីយ៉ាន់ម៉ា របស់លោក មីន អ៊ុងឡាំង។ ជាពិសេសពួកគេ កំពុងគិតថា កម្ពុជាកំពុងទទួលស្គាល់របបមេដឹកនាំមីយ៉ាន់ម៉ា។
តែយ៉ាងណាសម្ដេច លើកហេតុផលថា អ្វីដែលសម្ដេចធ្វើនេះ គឺមិនចង់ឃើញសមាជិកអាស៊ានទាំងអស់បែកបាក់គ្នា ខណៈដែលកិច្ចប្រជុំអាស៊ានកន្លងមក មានតែសមាជិក៩ប្រទេស ដោយអវត្តមានមីយ៉ាន់ម៉ា ព្រោះតែមិនគោរពគោលការណ៍៥ចំណុច។ បើតាមបំណងរបស់សម្ដេច ហ៊ុន សែន គឺចង់ឱ្យអាស៊ានវិលត្រឡប់មករូបភាពដូចដើម នៅក្នុងកិច្ចប្រជុំអាស៊ាន២០២២ ដែលកម្ពុជាធ្វើជាម្ចាស់ផ្ទះ។
«សុំកុំរំខានខ្ញុំទុកពេលវេលាឱ្យខ្ញុំធ្វើ(ជួបមេដឹកនាំមីយ៉ាន់ម៉ា) ខ្ញុំមិនធ្វើជាគ្រូអស់លោកអ្នកទេ ហើយអស់លោកអ្នក ក៏មិនមែនជាគ្រូខ្ញុំដែរ»។ នេះជាការលើកឡើងរបស់សម្ដេច ហ៊ុន សែន ដែលនៅតែប្រកាសពីជំហរទៅជួបលោក មីន អ៊ុងឡាំង មេដឹកនាំរបបយោធាមីយ៉ាន់ម៉ា នៅដើមខែមករា ឆ្នាំ២០២២។
សម្ដេច ហ៊ុន សែន បានបញ្ជាក់ថា សម្ដេចនឹងសាកល្បងយកបទពិសោធន៍ដោះស្រាយបញ្ហាជម្លោះនៅកម្ពុជា ទៅដោះស្រាយបញ្ហានៅមីយ៉ាន់ម៉ា តាមរយៈការជួបពិភាក្សាគ្នាជាមួយលោក មីន អ៊ុងឡាំង។ ដូច្នេះការដោះស្រាយបញ្ហានៅមីយ៉ាន់ម៉ាជោគជ័យ ឬមិនជោគជ័យ ក៏មិនត្រូវបន្ទោសកម្ពុជាដែរ។
គួរបញ្ជាក់ថា ប្រមុខរដ្ឋាភិបាលកម្ពុជា នឹងទស្សនកិច្ចផ្លូវការ នៅប្រទេសមីយ៉ាន់ម៉ា នាថ្ងៃទី៧ -៨ មករា ២០២២ ដើម្បីជួបពិភាក្សាជាមួយលោក មីន អ៊ុងឡាំង មេដឹកនាំរបបយោធា ពីកិច្ចសហប្រតិបត្តិការទ្វេរភាគីផង និងជុំវិញតំបន់ ក៏ជាអាស៊ានផង។ កាលពីថ្ងៃទី៧ ធ្នូ លោក វុនណា មួងវីន (Wunna Maung Lwin) រដ្ឋមន្រ្តីការបរទេសនៃរបបយោធាមីយ៉ាន់ម៉ា ក៏បានមកបំពេញទស្សនកិច្ចនៅកម្ពុជា និងបានចូលរួមពិភាក្សាការងារជាមួយសម្តេចនាយករដ្ឋមន្រ្តី ហ៊ុន សែន ។