ជាតិ
អភិបាលខេត្តព្រះសីហនុ រំលឹកដល់អ្នកពាក់ព័ន្ធកាន់កាប់ដីខុសច្បាប់ឲ្យរើចេញពីទីតាំងជាបន្ទាន់
លោក គួច ចំរើន អភិបាលខេត្តព្រះសីហនុ
×![]()
ដោយ: ថ្មីៗ
លោក គួច ចំរើន អភិបាលខេត្តព្រះសីហនុ កាលពីថ្ងៃទី១៥ ខែធ្នូ បានចេញសេចក្តីជូនដំណឹងដល់បុគ្គលពាក់ព័ន្ធនឹងការកាន់កាប់ដីខុសច្បាប់ ឲ្យបញ្ឈប់រាល់សកម្មភាពខ្លួន ហើយរុះរើសំណង់ចេញពីទីតាំងដី រួចប្រគល់ជូនរដ្ឋ និងម្ចាស់កម្មសិទ្ធិស្របច្បាប់វិញ។ បើនៅតែបន្តប្រព្រឹត្ត ពួកគេត្រូវប្រឈមចំពោះមុខច្បាប់។
ក្នុងសេចក្តីជូនដំណឹងរបស់ខ្លួន លោក គួច ចំរើន បានសរសេរព្រមានទៅកាន់អ្នកផ្តើមគំនិត អ្នកសមគំនិត អ្នកប្រព្រឹត្ត និងអ្នកញុះញង់ ដែលបាន និងកំពុងរុករានទន្ទ្រានកាន់កាប់ កាប់ឆ្ការ ឈូសឆាយ ដុត ហ៊ុមព័ទ្ធ សាងសង់សំណង់មិនរៀបរយ ស្នាក់នៅ និងដាំដំណាំផ្សេងៗ ក្នុងភូមិសាស្ត្រខេត្តព្រះសីហនុ។
បើតាមអភិបាលខេត្ត ទីតាំងសំខាន់ៗដែលត្រូវហាមឃាត់ការកាន់កាប់ខុសច្បាស់មានដូចជា ដីគម្របព្រៃឈើ ដីព្រៃលិចទឹក ដីព្រៃកោងកាង ដីតំបន់អភិរក្ស ដីនៅស្ថានីយដាំឈើអូរថ្ម ដីឧទ្យានជាតិ ដីឧទ្យានជាតិសមុទ្រ របៀងអភិរក្សជីវចម្រុះ ដីតំបន់ប្រើប្រាស់ច្រើនយ៉ាងព្រែកទឹកសាបក្បាលឆាយ និងដីកម្មសិទ្ធិឯកជន។
«ដើម្បីជៀសវាងការប្រឈមទោសទណ្ឌតាមផ្លូវច្បាប់ រដ្ឋបាលខេត្តព្រះសីហនុ សូមអំពាវនាវជាថ្មីម្តងទៀតដល់បុគ្គលពាក់ព័ន្ធទាំងអស់ ត្រូវបញ្ឈប់រាល់សកម្មភាពទាំងឡាយ ដោយធ្វើការរុះរើសំណង់ ហើយចាកចេញពីទីតាំងដី រួចប្រគល់ជូនអាជ្ញាធរកាន់កាប់ដីរដ្ឋ និងម្ចាស់កម្មសិទ្ធិស្របច្បាប់»។ នេះជាការព្រមានរបស់លោកអភិបាលខេត្តព្រះសីហនុ។
ជាមួយគ្នានេះ លោកបានលើកឡើងពីមាត្រាច្បាប់ផ្សេងៗ ដែលបានបង្ហាញពីការដាក់ទោសទណ្ឌ និងការពិន័យលើអ្នកប្រព្រឹត្តល្មើស ក្នុងនោះមានច្បាប់ស្តីពីព្រៃឈើ ច្បាប់ស្តីពីជលផល ច្បាប់ស្តីពីតំបន់ការពារធម្មជាតិ និងច្បាប់ភូមិបាល ជាដើម។
«ទទួលសេចក្តីជូនដំណឹងនេះ គណៈបញ្ជាការឯកភាពរដ្ឋបាលខេត្តព្រះសីហនុ និងគណៈបញ្ជាការឯកភាពរដ្ឋបាលក្រុង/ស្រុក ត្រូវចុះពិនិត្យ និងមានវិធានការច្បាប់ឲ្យបានម៉ឺងម៉ាត់»។ នេះជាការដាក់កំហិតរបស់លោក គួច ចំរើន៕
© រក្សាសិទ្ធិដោយ thmeythmey.com
