កីឡាអន្តរជាតិ
អន្តរជាតិ
Adam អតីតកីឡាករ Liverpool ត្រូវចាប់ខ្លួន ក្រោយបើកឡានបុកគល់ឈើទាំងស្រវឹង
× Charlie Adam អតីតកីឡាករ Liverpool ត្រូវបានចាប់ខ្លួនពីបទសង្ស័យបើកបរទាំងស្រវឹងក្រោយជិះរថយន្តប៉ះដើមឈើមួយដើមនៅថ្ងៃទី១៣ ខែធ្នូ។ ករណីល្មើសច្បាប់ចរាចរណ៍ផ្លូវគោកនេះ Adam នឹងត្រូវឡើងតុលាការផងដែរ។
Adam ដែលសព្វថ្ងៃជាប្រធានក្រុម Dundee FC នៃលីគកំពូលស្កុតឡែន ត្រូវបានកាសែត The Sun ផ្សាយថាបានធ្វើដំណើរលើផ្លូវ Dundee ទៅកាន់ផ្លូវ Broughty Ferry ហើយក៏ជួបឧបទ្ទវហេតុនៅម៉ោង ៤:២៥នាទីព្រឹកថ្ងៃទី១៣ ខែធ្នូ។
រូបភាពដែលទទួលបានពីកន្លែងកើតហេតុ បង្ហាញថារថយន្តរបស់ Adam បានប៉ះនឹងគល់ឈើ ខណៈប៉ូលីសស្កុតឡែនសន្និដ្ឋានថាអតីតកីឡាករហង្សក្រហមរូបនេះបើកបរទាំងស្រវឹង។
អតីតខ្សែបម្រើក្រុមជម្រើសជាតិស្កុតឡែន វ័យ៣៦ឆ្នាំ ក៏ត្រូវបានចាប់ខ្លួន និងចោទប្រកាន់ជុំវិញការបើកបរល្មើសច្បាប់ចរាចរណ៍ផ្លូវគោក និងត្រូវបញ្ជូនទៅតុលាការ។
ជុំវិញករណីរបស់ Adam អ្នកនាំពាក្យក្លិប Dundee FC អះអាងថាពួកគេបានដឹងអំពីរឿងនេះហើយ ប៉ុន្តែមិនធ្វើអត្ថាធិប្បាយបន្ថែមអ្វីទៀតលើកីឡាករខ្លួនរូបនេះឡើយ។
Dundee បច្ចុប្បន្នស្ថិតក្នុងចំណាត់ថ្នាក់ទី១០ ក្នុងតារាងពិន្ទុ Premiership ក្នុងចំណោមក្រុមទាំង១២ ក្រោយការប្រកួត១៨លើក រកបាន១៦ពិន្ទុ៕
Tag:
Charlie Adam
ច្បាប់ចរាចរណ៍
© រក្សាសិទ្ធិដោយ thmeythmey.com