កីឡាករវ័យ៣៣ឆ្នាំជាមិត្តជិតស្និតម្នាក់របស់ Messi បានផ្ទេរមក Barcelona កាលដើមរដូវកាលដោយរូបគេសង្ឃឹមថាអាចលេងជាមួយ Messi។ ប៉ុន្តែក្តីស្រមៃរបស់ Aguero ត្រូវបានរលាយទៅវិញដោយសារតែ Messi មិនអាចបន្តលេងឱ្យក្លិបក្នុងតំបន់ Catalonia នេះទៀតបាន ព្រោះក្លិបជួបបញ្ហាហិរញ្ញវត្ថុទើប Messi ត្រូវបង្ខំចិត្តទៅចូលរួមជាមួយក្លិបអ្នកមានបារាំង Paris Saint Germain កាលពីដើមរដូវកាល។
 

«ឆ្លងកាត់អាជីពជាកីឡាករជាមួយគ្នា Kun (Aguero) ពួកយើងធ្លាប់បានឆ្លងកាត់រឿងដែលអស្ចារ្យជាច្រើននិងរឿងមិនល្អខ្លះក៏ច្រើនដែរ ប៉ុន្តែពួកគាត់បានជួយឱ្យយើងទាំង២រីកចម្រើនធំឡើងហើយក្លាយជាមិត្តជិតស្និតបំផុត។ យើងក៏បានចំណាយពេលវេលាទាំងនោះលើទីលានទាំងអស់គ្នាផងដែរ។»Messi បានសរសេរផុសក្នុង Instagram។
 

ក្នុងសារដែល Messi សរសេរទៅកាន់ Aguero បានរំលឹករឿងរ៉ាវពីអតីតកាលជាច្រើននៅលើទីលាន រូមទាំងអនុស្សាវរីយ៍អបអរ ក្រោយពេលឈ្នះពានរង្វាន់ Copa America ថែមទៀត។


 

«ជាមួយការអបអរពេលលើកពាន Copa America កាលពីប៉ុន្មានខែមុន និងព្រមទាំងអ្វីគ្រប់យ៉ាង ដែលអ្នកសម្រេចបានកាលលេងនៅប្រទេសអង់គ្លេស។ការពិតវាបានបង្ហាញនៅពេលនេះ វាជារឿងឈឺចាប់ខ្លាំងពេលដែលមិនបានឃើញអ្នកបន្តធ្វើអ្វី ដែលអ្នកស្រលាញ់បន្តទៀត ដោយសារតែបញ្ហាសុខភាពរបស់អ្នក។ខ្ញុំសង្ឃឹមថាអ្នកនឹងបន្តជាមួយភាពរីករាយព្រោះអ្នកជាមនុស្សម្នាក់ចូលចិត្តភាពសប្បាយរីករាយ។ ពេលនេះអ្នកបានចាប់ផ្តើមជីវិតថ្មីហើយពួកយើងនៅតែស្រលាញ់អ្នកនឹងបន្តមានស្នាមញញឹមជាមួយគ្នារៀងរហូត។» Messi បានសរសេរ។
 

Aguero ចាប់តាំងមកដល់ក្លិប Barcelona គេបានចូលរួមប្រកួតជាមួយក្លិបត្រឹមតែ ៥ប្រកួតបន្ទាប់មក រូបគេក៏ទទួលរងបញ្ហាគាំងបេះដូង មិនអាចបន្តលេងបានទៀត។ កីឡាវ័យ៣៣ឆ្នាំរូបនេះក៏ធ្លាប់បានស៊ុតបាល់ចូលក្រុម Real Madrid ផងដែរនាជំនួប El Clasico៕