កីឡាជាតិ
ជាតិ
ហែលទឹកពិភពលោក៖ កីឡាករខ្មែរ-អាម៉េរិក ម៉ាត់ថេវ បញ្ចប់ចំណាត់ថ្នាក់លេខ៣២ក្នុងចំណោម៤៥នាក់ កីឡាករខ្មែរ-អាម៉េរិក ម៉ាត់ថេវ ហ្វ្រេងតារាបាននីឈី ថតសែលហ្វីជាមួយលោក នាង សុរិទ្ធិយ៉ា ដែលជា គ្រូបង្វឹក
× កីឡាករខ្មែរ-អាម៉េរិក ម៉ាត់ថេវ ហ្វ្រេងតារាបាននីឈី (Mathew Frank Bennici) បានទទួលចំណាត់ថ្នាក់លេខ៣២ក្នុងចំណោមកីឡាករ៤៥នាក់លើវិញ្ញាសាហែលមេអំបៅចម្ងាយ២០០ម៉ែត្រក្នុងព្រឹត្តិការណ៍ប្រកួតជើងឯកកីឡាហែលទឹកពិភពលោក-អាងហែលទឹក២៥ម៉ែត្រ (15th FINA World Swimming Championships -25m 2021) នៅប្រទេសអេមីរ៉ាតអារ៉ាប់រួម នាថ្ងៃទី១៦ ខែធ្នូ នេះ។
កីឡាករតំណាងឲ្យកម្ពុជា វ័យ២១ឆ្នាំ បានទទួលចំណាត់ថ្នាក់លេខ១ក្នុង Heat 1 ដែលមានអត្ថពលិក៦នាក់ ជាមួយនឹងថិរវេលា ២:00.៩៥ នាទី ពោលគឺនាំមុខកីឡាករអេមីរ៉ាតអារ៉ាប់រួម Ghalib Sabt, កីឡាករហ្សីលប្រាល់តា Johnpaul Balloqui, កីឡាករគូវែត Mashari Alsamhan និងកីឡាករលីប៊ី Siraj Sufiyan A.Ai Sharif។
ទោះបីជាយ៉ាងណាក៏ដោយ សរុបលទ្ធផលទាំង៥ Heat កីឡាករ ម៉ាត់ថេវ បានត្រឹមចំណាត់ថ្នាក់លេខ៣២ ក្នុងចំណោមកីឡាករសរុប៤៥នាក់។ កីឡាករដែលមានពិន្ទុខ្ពស់ជាងគេ៨នាក់ ត្រូវឈានបន្តទៅប្រកួតប្រជែងដណ្តើមមេដាយនៅវគ្គផ្តាច់ព្រ័ត្រ។
នេះជាការបង្ហាញខ្លួនលើកទីមួយ តំណាងឲ្យកម្ពុជា សម្រាប់កីឡាករខ្មែរ-អាមេរិក កីឡាករ ម៉ាត់ថេវ។ លោក Matt Donovan គ្រូបង្វឹកនៃ University of Maryland Baltimore County (UMBC) បាននិយាយតាមរយៈគេហទំព័ររបស់ UMBC ថា៖« យើងមានមោទកភាពចំពោះ ម៉ាត់ថេវ និងមោទកភាពចំពោះប្រវត្តិ នៃការតំណាង ក្នុងការប្រកួតហែលទឹក នៅលើឆាកអន្តរជាតិ ។ ម៉ាត់ថេវ គឺជាកីឡាករ ដែលព្យាយាម និងប្រឹងប្រែងខ្ពស់ និងស្វែងរកកិត្តិយស តាមរយៈការប្រកួតកីឡា» ។
ដោយឡែក កីឡាករ និងកីឡាការិនីជម្រើសជាតិ ៣រូបផ្សេងទៀតមាន កីឡាករ មនត្រស ផានសុវណ្ណអារុន, កីឡាការិនី កាំង មុយនីន និងកីឡាការិនី ម៉ីលិតាន មីននិក បានត្រៀមខ្លួនដើម្បីប្រកួតវិញ្ញាសាផ្សេងទៀត ។ គួរបញ្ជាក់ដែរថា ក្រៅពីប្រទេសនៅអាស៊ី តាមរយៈគណៈកម្មាធិការជាតិអូឡាំពិកកម្ពុជា (NOCC) មានជាង១៨០ប្រទេស ចូលរួមនៅក្នុងព្រឹត្តិការណ៍នេះ ៕
© រក្សាសិទ្ធិដោយ thmeythmey.com