បើរៀងភ្ជាប់ពីខាងដើមសព្ទដទៃ អានថា «សៈម៉ុត-ទៈ ឬ –ទ្រៈ» ដូចជា សមុទ្ទកន្តា ឬ សមុទ្រកាន្តា សម្លាញ់របស់សមុទ្រ គឺទន្លេ, នទី ។ សមុទ្ទកន្ដារ ឬ សមុទ្រ– ផ្លូវឆ្ងាយព្រោះការឆ្លងទឹកសមុទ្រ។ ការជិះមហានាវាក្នុងសមុទ្ទកន្ដារ ត្រូវផ្គង់ស្បៀងអាហារនិងទឹកសាបឲ្យមានជានិច្ច ។

 

សមុទ្ទជាត អ្វីៗដែលកើតក្នុងសមុទ្ទ, របស់សមុទ្ទ ។ សមុទ្របត្នី ប្រពន្ធសមុទ្រ គឺទន្លេ នទី ។ សមុទ្រមាលិនី កម្រងសមុទ្រគឺផែនដី ។ សមុទ្រមេខលា សំដៅ​លើ​ខ្សែក្រវាត់សមុទ្រគឺផែនដី, ពិភពលោក ។ 

 

សមុទ្រយាត្រា ការដើរសមុទ្រ ។ សមុទ្រយាន ទូក, សំពៅ, កប៉ាល់ សម្រាប់ដើរសមុទ្រ ។ សមុទ្រសារ ខ្លឹមសមុទ្រគឺខ្យងសមុទ្រ, ខ្យងស័ង្ខ ។ សមុទ្ទសុប័ដ្តន៍ កំពង់មាត់សមុទ្ទ ។ ល ។

 

ពាក្យមួយទៀតដែលមានន័យស្មើ សមុទ្រ ឬ សមុទ្ទ នោះ គឺ «សាគរ»។ សាគរា, សាគរេស, សាគរោ សមុទ្រ ។ សាគរេ ក្នុងសមុទ្រ ។ សាគរវិទ្យា មានន័យថា វិទ្យានិយាយពីសមុទ្រ ( ជាភាសាបារាំងគឺ Océanographie អូស្យាណូគ្រ័ហ្វ‍៊ី )៕