បើទោះមានប្រទេសជាច្រើនបានរកឃើញករណីឆ្លងជំងឺកូវីដ-១៩ បង្កដោយវីរុសអូមីក្រុង ប៉ុន្តែវាមានករណីស្លាប់តិចតួចណាស់ដែលត្រូវបានប្រកាសបណ្តាប្រទេសមួយចំនួន។ ស្របពេលមានករណីស្លាប់តិចតួចបែបនេះ អ្នកជំនាញអង្គការសុខភាពពិភពលោក បានព្រមានថា មិនត្រូវមើលស្រាលលើវីរុសអូមីក្រុងឡើយ ព្រោះវាមិនទាន់មានទិន្នន័យជាក់លាក់។ 

 

តើករណីស្លាប់ដោយសារវីរុសអូមីក្រុងមានប៉ុន្មានករណី? ហើយតើប្រទេសណាខ្លះ បានរាយការណ៍ពីករណីស្លាប់ដោយសារជំងឺកូវីដ-១៩ បង្កដោយវីរុសអូមីក្រុង? 

 

អង់គ្លេស ជាប្រទេសមួយ ដែលបានរាយការណ៍ពីករណីស្លាប់ដោយសារជំងឺកូវីដ-១៩ បង្កដោយវីរុសអូមីក្រុង ដំបូងគេបំផុត។ គិតត្រឹមថ្ងៃទី២០ ខែធ្នូ អ្នកស្លាប់ដោយសារវីរុសអូមីក្រុងនៅចក្រភពអង់គ្លេស បានកើនដល់១២នាក់ ខណៈករណីឆ្លងវីរុសបំប្លែងខ្លួនថ្មីនេះ មានប្រមាណជាង ១២០០០ករណី។ អ្នកជំនាញ បានព្រមានថា អង់គ្លេស អាចនឹងមានករណីឆ្លងវីរុសអូមីក្រុងច្រើនជាងនេះក្នុងមួយថ្ងៃ។ 

 

ឯអាម៉េរិកវិញ នៅថ្ងៃទី២០ ខែធ្នូ បានរាយការណ៍ករណីស្លាប់១នាក់ ដោយសារជំងឺកូវីដ-១៩ បង្កដោយវីរុសអូមីក្រុងលើកដំបូង។ ករណីស្លាប់នេះ កើតមាននៅតំបន់Harris ក្នុងរដ្ឋTexas។ តាមការបញ្ជាក់របស់អាជ្ញាធរតំបន់ បុរសដែលបានទទួលមរណភាពនោះ មិនទាន់បានទទួលវ៉ាក់សាំងបង្ការជំងឺកូវីដ-១៩ ទេ។ 

 

ករណីស្លាប់នេះ កើតឡើងស្របពេលមន្រ្តីសុខាភិបាលអាម៉េរិក បានព្រមានថា ករណីឆ្លងជំងឺកូវីដ-១៩ បង្កដោយវីរុសអូមីក្រុង អាចមានរហូតដល់ ៧៣,២ភាគរយឯណោះ នៃករណីឆ្លងថ្មី ក្នុងរយៈពេលប៉ុន្មានសប្តាហ៍ចុងក្រោយ៕