ចំនួនករណីឆ្លងដ៏ច្រើននេះ រកឃើញក្រោយការធ្វើតេស្តលើកីឡាករ និងបុគ្គលិកសរុបចំនួន ១៥១៨៦នាក់ នៅចន្លោះថ្ងៃទី២០ ដល់ថ្ងៃទី២៦ ខែធ្នូ ស្របពេល Premier League បានណែនាំឡើងវិញនូវការធ្វើតេស្តប្រចាំថ្ងៃ ចាប់តាំងពីវីរុសបំប្លែងខ្លួនថ្មីអូមីក្រុងរាតត្បាត។
 

ចំនួនអ្នកឆ្លងកើនឡើងពីមួយសប្តាហ៍ទៅមួយសប្តាហ៍នៅរយៈពេលចុងក្រោយ បានធ្វើឱ្យការប្រកួតនៅលីគកំពូលអង់គ្លេសចំនួន១៥គូ ត្រូវបានលុបចោលក្នុងអំឡុងខែធ្នូ។ បើទោះមានករណីឆ្លងច្រើន ប៉ុន្តែ Premier League នឹងមិនផ្អាកលីគទាំងមូលឡើយ ដោយសុខចិត្តឱ្យមានការពន្យារពេលប្រកួតសម្រាប់ក្រុម ដែលមានករណីឆ្លងច្រើនប៉ុណ្ណោះ។
 

ស្ងាប័ន Premier League ទទូចឱ្យកីឡាករ បុគ្គលិក និងអ្នកពាក់ព័ន្ធទាំងអស់បង្កើនវិធានការការពារឡើងវិញ ដូចជាការពាក់ម៉ាស់ ឬរបាំងមុខទាំងនៅផ្ទះ និងចេញក្រៅ រួមទាំងរក្សាគម្លាតសុវត្ថិភាព ក៏ដូចជាការបង្កើនការធ្វើតេស្តជាប្រចាំផងដែរ។
 

«លីគបន្តធ្វើការជាមួយក្លិបនានាដើម្បីរក្សាសុវត្ថិភាពកីឡាករ បុគ្គលិកដោយជួយកាត់បន្ថយហានិភ័យនៃការឆ្លងកូវីដ-១៩ នៅក្នុងក្រុមរបស់ពួកគេ។ យើងក៏កំពុងទំនាក់ទំនងយ៉ាងជិតស្និទ្ធជាមួយរដ្ឋាភិបាល អាជ្ញាធរមូលដ្ឋាន និងក្រុមអ្នកគាំទ្រដើម្បីណែនាំឱ្យពួកគេបង្កើនការការពារខ្លួនឡើងវិញ»។ នេះជាការលើកឡើងរបស់ Premier League៕