តាមទិន្នន័យវេបសាយ Global Forest Watch ប្រទេសចំនួន ១០ បានបាត់បង់ព្រៃឈើច្រើនជាងបណ្តាប្រទេសផ្សេងទៀតនៅក្នុងឆ្នាំ ២០២០។ ប្រទេសទាំង១០ នោះ មានដូចជា៖  

 

១. ប្រេស៊ីល​ ដែលស្ថិតនៅតំបន់អាម៉េរិកឡាទីន ជាប្រទេសបាត់បង់ព្រៃឈើ ដោយសារភ្លើងឆេះ និងការកាប់បំផ្លាញច្រើនជាងគេ។ នៅក្នុងឆ្នាំ ២០២០ ប្រេស៊ីល បានបាត់បង់ព្រៃឈើ ប្រមាណ ៣,២លានហិកតា។ 

 

២. សាធារណរដ្ឋប្រជាធិបតេយ្យកុងហ្គោ បានរងការទន្រ្ទានព្រៃឈើខ្លាំងជាងគេលំដាប់ទី២ ដោយអត្រាការកាប់បំផ្លាញព្រៃឈើប្រចាំឆ្នាំលើសពី ១លានហិកតា ក្នុងរយៈពេល៥ឆ្នាំចុងក្រោយ​នេះ។ នៅឆ្នាំ២០២០ ប្រទេសស្ថិតក្នុងតំបន់អាហ្វ្រ៊ិកកណ្តាលមួយនេះ បានបាត់បង់ព្រៃឈើចំនួន ១,៣១ លានហិកតា។

 

៣.បូលីវី ​មានការកើនឡើងនៃអត្រាកាប់បំផ្លាញព្រៃឈើជាបន្តបន្ទាប់​ ដោយមានជាមធ្យមប្រមាណ ១៥ម៉ឺនហិកតាក្នុងមួយឆ្នាំ នៅអំឡុងទសវត្សរ៍ឆ្នាំ១៩៩០ ដល់៣០ម៉ឺនហិកតា ក្នុងចន្លោះឆ្នាំ២០១៦-២០១៨។ នៅឆ្នាំ២០២០ ប្រទេសស្ថិតនៅតំបន់អាម៉េរិកខាងត្បូងនេះ បានរាយការណ៍ ការបាត់បង់គម្របព្រៃឈើ សរុប ៤៣ម៉ឺនហិកតា។

 

៤.​​  ឡាវ ជាប្រទេសមួយមានព្រៃឈើធម្មជាតិច្រើនជាង ១៧ លានហិកតា។ ប៉ុន្តែនៅឆ្នាំ២០២០ ប្រទេសអាស៊ីអាគ្នេយ៍មួយនេះ មានចំនួនបាត់បង់ព្រៃឈើជាង ៣៥ម៉ឺនហិកតា។

 

៥. ​​កូឡុំប៊ី ជាប្រទេសដែលមានជីវចម្រុះធំបំផុតទី២លើពិភពលោក និងជាជម្រកសម្រាប់រុក្ខជាតិ និងសត្វប្រហែល១០ភាគរយរបស់ពិភពលោក។ បើទោះសម្បូរព្រៃឈើ និងជីវចម្រុះច្រើន ប៉ុន្តែទឹកដីនេះ បានបាត់បង់ព្រៃឈើធម្មជាតិជាង ៣២ម៉ឺនហិកតា។

 

៦. ម៉ិកស៊ិក មានព្រៃឈើគ្របដណ្តប់លើផ្ទៃដីប្រហែល ៦៤លានហិកតា ឬ ៣៤,៥ភាគរយនៃប្រទេស។ ប្រទេសមួយនេះ បានបាត់បង់ព្រៃឈើ​​ប្រមាណ ២៩ម៉ឺនហិកតា។

 

៧. ប៉េរ៉ូ  ជាប្រទេសទី៣ធំជាងគេនៅអាម៉េរិកខាងត្បូងនិងជាតំបន់ដែលមានព្រៃឈើច្រើនជាងគេលំដាប់ទី១០លើពិភពលោក។ ប៉ុន្តែប្រទេសនេះ បានកាប់បំផ្លាញព្រៃឈើប្រមាណ ២៨ម៉ឺនហិកតាជារៀងរាល់ឆ្នាំ។ នៅឆ្នាំ២០២០ ប៉េរ៉ូ​ បានកាប់ព្រៃឈើធម្មជាតិយ៉ាងហោច ២៧ម៉ឺនហិកតា។

 

៨. ឥណ្ឌូណេស៊ី ដែលជាប្រទេសមួយស្ថិតនៅតំ​បន់អាស៊ីអាគ្នេយ៍ និងសម្បូរព្រៃឈើដ៏ច្រើន ក៏ត្រូវបានចាត់ចូលក្នុងបញ្ជីបាត់បង់ព្រៃឈើខ្លាំងជាងគេដែរ។ ប៉ុន្តែប្រទេសមួយនេះ បានធ្លាក់ចុះអត្រាកាប់បំផ្លាញព្រៃឈើ គួរឱ្យសម្គាល់ នាប៉ុន្មានឆ្នាំចុងក្រោយ។ នៅឆ្នាំ២0២០​ ឥណ្ឌូណេស៊ី បានបាត់បង់ព្រៃឈើចំនួន​ ២៧ម៉ឺនហិកតា។

 

៩​​.​​កាមេរូន ជាប្រទេសស្ថិតនៅអាហ្រ្វ៊ិកខាងលិច មានព្រៃត្រូពិចដ៏ក្រាស់ចំនួន ១៩លានហិកតា។ ប៉ុន្តែប៉ុន្មានឆ្នាំចុងក្រោយ សកម្មភាពកាប់ព្រៃឈើបានកើនឡើងយ៉ាងគំហុក។ នៅឆ្នាំ២០២០ ប្រទេសនេះ បានបាត់បង់ព្រៃឈើជាង២០​ម៉ឺនហិកតា។

 

១០. ម៉ាឡេស៊ី មានទំហំព្រៃឈើប្រមាណ២០លានហិកតា។ នៅឆ្នាំ២០២០ ម៉ាឡេស៊ីបានបាត់បង់ព្រៃឈើជាង១២ម៉ឺនហិកតា៕