មួយគ្រាប់របស់ Kai Havertz និងបាល់ចូលទីខ្លួនឯង (own goal) របស់ខ្សែការពារ Ben Davies បានជួយតោខៀវឈ្នះមាន់ខ្នាយមាស ២-០ នៅជើងទី១ដែលធ្វើឡើងនៅ Stamford Bridge។

តាមរយៈជ័យជម្នះនេះបានជួយក្រុមលោក Thomas Tuchel មានប្រៀបនៅជើងទី២ វគ្គ១/២ផ្តាច់ព្រ័ត្រដែលត្រូវធ្វើនៅទឹកដី Tottenham Hotspur នាថ្ងៃទី១៣ ខែមករា។
 

ដោយឡែកជំនួបរវាង Liverpool និង Arsenal ជើងទី១នៅ Anfield ត្រូវបានពន្យាពេលដ្បិតកីឡាកររបស់ហង្សក្រហមជាច្រើនអ្នក រួមទាំងបុគ្គលិកឆ្លងកូវីដ-១៩ ខណៈអ្នកចាត់ការទូទៅលោក Jurgen Klopp ត្រូវដាក់ឱ្យនៅដាច់ដោយឡែក។
 

បើតាមការផ្សារយរបស់កាសែត BBC អ្នកចាំទី Alisson ខ្សែការពារ Joel Matip និងខ្សែប្រយុទ្ធ Roberto Firmino តេស្តចេញលទ្ធផលវិជ្ជមានកូវីដ-១៩។ Liverpool មិនមានកីឡាករគ្រប់គ្រាន់ដើម្បីប្រកួតឡើយដ្បិតក្រៅពីអ្នកឆ្លងកូវីដ-១៩ កីឡាករសំខាន់ៗផ្សេងទៀត Mohamed Salah, Sadio Mane និង Naby Keita ត្រូវទៅបំពេញភារកិច្ចជាមួយក្រុមជម្រើសជាតិក្នុងការប្រកួតពានអាហ្វ្រិក Africa Cup of Nations។
 

ជំនួបជើងទី១រវាង Liverpool និង Arsenal ត្រូវលើកពេលទៅធ្វើនៅថ្ងៃទី១៣ ខែមករា វិញ និងជើងទី២ធ្វើនៅថ្ងៃទី២០ ខែមករា នៅកីឡដ្ឋាន Emirates៕