ភ្នំពេញ៖ កម្ពុជារកចំណូលបានប្រមាណ ៦៦លានដុល្លារអាម៉េរិក​ តាមរយៈការនាំចេញផលិតកម្មសត្វ ក្នុងឆ្នាំ២០២១ កើនឡើងប្រហែល៤០ភាគរយ បើធៀបនឹងឆ្នាំ២០២០ ដែលកម្ពុជាទទួលបានចំណូលជាង៤៧លានដុល្លាអាម៉េរិក។

 

នាឆ្នាំ២០២១ កម្ពុជាបាននាំចេញផលិតកម្មសត្វចំនួន៩មុខ ទៅកាន់ទីផ្សរារបរទេស។ ផលិតកម្មសត្វទាំងនោះមាន គោរស់ ជ្រូកពូជ ស្វារស់ ស្បែកគោស្ងួត ស្បែកគោសើម ស្បែកជ្រូកស្ងួត  ទឹកដោះគោ ចំណីឆ្កែ និងរោមសត្វទា ។ នេះបើតាមរបាយការណ៍លើគណនីហ្វេសប៊ុក លោក វេង សាខុន​ រដ្ឋមន្ត្រីក្រសួងកសិកម្ម​​ រុក្ខាប្រមាញ់ និងនេសាទ។
 

តាមរបាយការណ៍ដដែលបានលម្អិតទៀតថា ការនាំចេញផលិតកម្មសត្វចំនួន៩មុខនេះ កម្ពុជារកចំណូលបាន ៦៦ ១៣១ ៩៣៥ ដុល្លារអាម៉េរិក ខណៈកាលពីឆ្នាំ២០២០ កម្ពុជារកចំណូលពីការនាំចេញផលិតកម្មសត្វបាន ៤៧ ១៨៧ ៥៩០ដុល្លារអាម៉េរិក ប៉ុណ្ណោះ។ ទិន្នន័យឆ្នាំ២០២១កើនឡើងចំនួន ៤០,១ភាគរយ បើធៀបនឹងឆ្នាំ២០២១។
 

សូមជម្រាបថាក្រៅពីការនាំចេញ ផលិតកម្មសត្វ នៅឆ្នាំ២០២១ កម្ពុជាបានចេញកសិផលជាង ៧,៩លានតោន ទៅទីផ្សារប្រទេសចំនួន ៦៨ រកចំណូលបានជិត៥ពាន់លានដុល្លារ កើនឡើងជាង ៦៣ភាគរយ បើធៀបនឹងការនាំចេញកសិផល ទៅក្រៅប្រទេសក្នុងឆ្នាំ២០២០៕