នៅបារាំង សេចក្ដីស្នើច្បាប់ដែលកំហិតសកម្មភាពប្រជាជនមិនបានចាក់វ៉ាក់សាំងបង្ការជំងឺកូវីដ-១៩ កំពុងស្ថិតក្នុងដៃរដ្ឋសភា ស្របពេលដែលប្រជាជនមិនពេញចិត្តនឹងគម្រោងនេះ ហើយប្រមូលផ្ដុំតវ៉ានៅតាមទីក្រុងក្នុងប្រទេស។ តាមគម្រោង ពេលចូលធរមាន ច្បាប់នេះតម្រូវឱ្យប្រជាជនបារាំងបង្ហាញលិខិតទទួលបានវ៉ាក់សាំង មុនចូលភោជនីយដ្ឋាន ប្រើសេវារថភ្លើង ឬចូលរួមព្រឹត្តិការណ៍ផ្សេងៗ។ 

 

បើតាមក្រសួងមហាផ្ទៃបារាំង បាតុកម្មនៅថ្ងៃទី៨ ខែមករា មានអ្នកចូលរួមជាង១០ម៉ឺននាក់។ រដ្ឋធានីប៉ារីស រាយការណ៍អ្នកតវ៉ាជាង១៨ ០០០នាក់ ដោយក្នុងនោះ មនុស្សបីនាក់ ត្រូវចាប់ខ្លួន ស្របពេលប៉ូលិស៣នាក់រងរបួសស្រាល។ មនុស្សប្រមាណ៦ពាន់នាក់ តវ៉ានៅទីក្រុងទូឡុង ខណៈនៅទីក្រុងម៉ុងប៉េលីយេ ប៉ូលិសបារាំងប្រើឧស្ម័នបង្ហូរទឹកភ្នែកក្នុងប៉ះទង្គិចជាមួយក្រុមបាតុករ។

 

នៅឯទីក្រុងប៉ារីស បាតុករភាគច្រើនដែលត្រូវមើលឃើញថា​ មិនបានពាក់ម៉ាស ស្រែកតវ៉ាប្រឆាំងវិធានការរបស់ប្រធានាធិបតី អេម៉ានុយអែល ម៉ាក្រុង ដោយលើកបដាសរសេរឃ្លាផ្សេងដូចជាការពិត និងនិយាយថាទេចំពោះវ៉ាក់សាំងជាដើម។ បាតុករខ្លះ យកពាក្យលោក ម៉ាក្រុង ដែលចង់បំបិទអ្នកមិនចាក់វ៉ាក់សាំងពីសកម្មភាពសង្គម ទៅប្រើចម្អកឱ្យលោកវិញផង ហើយខ្លះទៀតចោទប្រធានាធិបតីថា យកចិត្តទុកដាក់ប្រជាជនមិនស្មើគ្នា។

 

លោក ម៉ាក្រុង បានបង្ហាញការមិនសប្បាយចិត្តចំពោះប្រជាជនបារាំងមួយចំនួនដែលចចេសមិនចាក់វ៉ាក់សាំង នៅពេលដែលប្រជាជនជាង៧០ភាគរយទទួលរួចហើយនោះ។ សម្រាប់លោក បើទោះជាប្រជាជនបារាំងមានសិទ្ធិសេរីភាពក្ដី ពួកគេក៏មានកាតព្វកិច្ចដែលត្រូវអនុវត្តផងដែរ។ ដោយសារហេតុនេះ លោក ម៉ាក្រុង ក៏ប្រកាសចង់ហាមឃាត់អ្នកទាំងនោះពីសង្គមតែម្ដងរហូតដល់ពួកគេទទួលបានវ៉ាក់សាំងសិន៕