COVID-19
អន្តរជាតិ
ទីក្រុងធានជីន ធ្វើតេស្តប្រជាជនជាង១៤លាននាក់ ក្រោយរកឃើញវីរុសអូមីក្រុង២ករណី
× ទីក្រុងកំពង់ផែចិនធានជីនដែលស្ថិតនៅភាគខាងជើងប្រទេស នៅថ្ងៃទី៩ ខែមករាបានចាប់ផ្ដើមយុទ្ធនាការធ្វើតេស្ដរកជំងឺកូវីដ-១៩ ទូទាំងទីក្រុង បន្ទាប់ពីបានរកឃើញករណីឆ្លងជំងឺនេះក្នុងសហគមន៍ចំនួន២០ករណី។ ក្នុងនោះ ២ករណី ជាវីរុសបំប្លែងខ្លួនថ្មីអូមីក្រុង។
បើតាមការអះអាងរបស់អាជ្ញាធរទីក្រុងធានជីន ការវិភាគហ្សែនបានបង្ហាញពីការពាក់ព័ន្ធរវាងករណីឆ្លងវីរុសអូមីក្រុងទាំង២ករណី ដែលគ្មានប្រវត្តិទៅក្រៅប្រទេសឡើយ។ អ្នកជំងឺទាំងពីរនាក់នោះ មានម្នាក់ជាបុគ្គលិកថែទាំសិស្ស រីឯម្នាក់ទៀតជាសិស្សក្នុងកម្រិតថ្នាក់បឋមសិក្សា។ ករណីចំនួន១៨ផ្សេងទៀតត្រូវបានរកឃើញនៅពេលតេស្តរកជំងឺកូវីដ-១៩ចំពោះ អ្នកដែលបានទាក់ទងជិតស្និទ្ធជាមួយអ្នកជំងឺពីរនាក់ខាងលើ។
អ្នកផ្សេងទៀតដែលបានឆ្លងជំងឺគឺជាសិស្សដែលបានទៅកន្លែងថែទាំដូចគ្នា ឬសាលារៀនដូចគ្នា ហើយក៏មានឪពុកម្តាយរបស់ពួកគេផងដែរ។ ករណីទាំង២០នេះត្រូវបានរកឃើញនៅខណ្ឌជីងណាន ទីក្រុងធានជីនដែលជាទីក្រុងដែលមានប្រជាជនជាង១៤លាននាក់ឯណោះ។
«តាមរយៈការវិនិច្ឆ័យពីទំនាក់ទំនងរវាងករណី និងខ្សែច្រវាក់ចម្លង ករណីទាំង១៨ បានចម្លងជំងឺបន្តទៀតយ៉ាងហោចណាស់ទៅកាន់មនុស្សបីជំនាន់»។ នាយករងមជ្ឈមណ្ឌលគ្រប់គ្រង និងបង្ការជំងឺធានជីន Zhang Ying បានលើកឡើងបែបនេះនៅល្ងាចថ្ងៃទី៨ ខែមករា មុនបន្តថា ការរីករាលដាលក្នុងសហគមន៍ប្រហែលបានកើតឡើងក្នុងរយៈពេលជាក់លាក់ណាមួយមុនពេលបានរកឃើញករណីឆ្លងខាងលើនៅព្រឹកថ្ងៃទី៨ ខែមករា។ ករណីឆ្លងជាច្រើនទៀត ទំនងជាត្រូវបានរកឃើញនៅក្នុង ការធ្វើតេស្តទ្រង់ទ្រាយធំទូទាំងទីក្រុង។
អាជ្ញាធរផ្នែកសុខាភិបាលបានបញ្ជាក់ថា បុគ្គលិកថែទាំសិស្សដែលផ្ទុកវីរុស អូមីក្រុងនោះមិនបានធ្វើដំណើរចេញពីទីក្រុងនោះទេក្នុងអំឡុងពីរសប្ដាហ៍មកនេះ។ បន្ថែមពីនេះ លំដាប់ហ្សែននៃអ្នកជំងឺទាំងពីរមិនបានបញ្ជាក់ថា ទាក់ទងនឹងករណីនាំចូលនោះឡើយ។ ការសិក្សាបន្ថែមទៀតអំពីដើមចមនៃការឆ្លងក្នុងសហគមន៍នេះកំពុងតែធ្វើឡើង។
គួរបញ្ជាក់ថា ទីក្រុងធានជីន មានទីតាំងក្បែងរដ្ឋធានីប៉េកាំងដេលអាចចំណាយពេលតែពីរម៉ោងប៉ុណ្ណោះពីទីក្រុងនេះ។ ករណីបែបនេះ រឹតតែបង្កការព្រួយបារម្ភសម្រាប់ទីក្រុង ប៉េកាំងដែលនឹងធ្វើជាម្ចាស់ផ្ទះសម្រាប់ព្រឹត្តិការណ៍កីឡាអូឡាំពិករដូវរងាឆ្នាំ២០២២ នៅខែក្រោយ៕
© រក្សាសិទ្ធិដោយ thmeythmey.com