អន្តរជាតិ
ឥណ្ឌូណេស៊ីកំពុងពិចារណាបើកនាំចេញធ្យូងថ្មវិញ ក្រោយមានការទទូចពីប្រទេសមួយចំនួន ធ្យូងថ្ម កំពុងត្រូវបានលើកចេញពីកប៉ាល់នៅឯស្ថានីយ៍មួយរបស់ឥណ្ឌូណេស៊ី។ រូបថត AFP
× រដ្ឋាភិបាលឥណ្ឌូណេស៊ី នឹងអាចឈានដល់ការសម្រេចចិត្តចំពោះការនាំចេញធ្យូងថ្មឡើងវិញនៅប៉ុន្មានថ្ងៃខាងមុខ។ រដ្ឋមន្រ្តីថាមពល និងធនធានរ៉ែឥណ្ឌូណេស៊ីលើកឡើងបែបនេះ នៅថ្ងៃទី១០ ខែមករា ស្របពេលបណ្តាប្រទេសនៅអាស៊ីមួយចំនួនដែលពឹងផ្អែកលើធ្យូងថ្មពីឥណ្ឌូណេស៊ីជំរុញឱ្យប្រទេសនេះលុបចោលការហាមឃាត់ការនាំចេញធ្យូងថ្ម។
ឥណ្ឌូណេស៊ីដែលជាប្រទេសនាំចេញធ្យូងថ្មដ៏ធំបំផុតនៅពិភពលោក ផ្អាកការនាំចេញធ្យូងថ្មពេញមួយខែមករា ឆ្នាំ២០២២។ ការផ្អាកនាំចេញនេះសម្រេចឡើងក្រោយមានការបារម្ភជុំវិញការខ្វះខាតធ្យូងថ្មសម្រាប់រោងចក្រថាមពលក្នុងស្រុក។ វិធានការហាមឃាត់នេះ បានធ្វើឱ្យប៉ះពាល់បណ្តាប្រទេសជាច្រើនដូចជាកូរ៉េខាងត្បូង ចិន ជប៉ុន និងហ្វីលីពីនជាដើម។
«យើងបានស្តុកទុករួចរាល់ហើយ។ យើងសង្ឃឹមថានៅប៉ុន្មានថ្ងៃខាងមុខនឹងមានការបញ្ជាក់បន្ថែមទៀត។ ដូច្នោះ យើងអាចធានាបានថា មិនមានភាពខ្វះខាតធ្យូងថ្ម និងអាចបន្តការនាំចេញបាន»។ រដ្ឋមន្រ្តីថាមពល និងធនធានរ៉ែឥណ្ឌូណេស៊ី Arifin Tasrif អះអាងនៅក្នុងកិច្ចប្រជុំតាមប្រព័ន្ធអនឡាញ ជាមួយរដ្ឋមន្ត្រីឧស្សាហកម្មជប៉ុន Koichi Hagiuda ។
ជប៉ុនស្ថិតក្នុងចំណោមប្រទេសផ្សេងៗទៀតដូចជា ហ្វីលីពីន ជប៉ុន និងកូរ៉េខាងត្បូងដែលបានជំរុញឱ្យឥណ្ឌូណេស៊ីបន្ធូបន្ថយវិធានការបិទការនាំចេញធ្យូងថ្មនេះ។
កន្លងមក ស្ថានទូតជប៉ុននៅទីក្រុងហ្សាកាតាបានជំរុញឱ្យឥណ្ឌូណេស៊ីដកធ្យូងថ្មដែលផ្តល់កម្តៅខ្ពស់(high-calorific coal) ពីការហាមឃាត់ការនាំចេញ ដោយសារវាមិនត្រូវបានប្រើប្រាស់ដោយរោងចក្រថាមពលនៅឥណ្ឌូណេស៊ីឡើយ ហើយក៏ស្នើជំរុញឱ្យឥណ្ឌូណេស៊ីអនុញ្ញាតនាវាចំនួន៥ដែលមានផ្ទុកធ្យូងថ្មរួចទៅហើយនោះធ្វើដំណើរចេញទៅជប៉ុន។
យ៉ាងណាមិញ អាជ្ញាធរឥណ្ឌូណេស៊ីអះអាងថា ទោះបីមានការស្តុកទុកគ្រប់គ្រាន់សម្រាប់ការផ្គត់ផ្គង់អគ្គិសនីក្នុងស្រុកក្តី បញ្ហាផ្សេងៗទៀតនឹងត្រូវបានគិតគូរមើលមុនពេលលុបចោលការហាមឃាត់។ បន្ថែមពីនេះ មន្ត្រីឧស្សាហកម្មឥណ្ឌូណេស៊ីប្រាប់ទីភ្នាក់ងារសារព័ត៌មាន Reuters ថាការពិភាក្សាអំពីបញ្ហានេះត្រូវបានរំពឹងនឹងបន្តនៅថ្ងៃទី១០ ខែមករា ដោយផ្តោតលើបញ្ហាភស្តុភារ ៕ © រក្សាសិទ្ធិដោយ thmeythmey.com