ជាតិ
×![]()
ដោយ: ឈុំ ចន្ថា
ភ្លើងឆេះព្រៃ កើតឡើងជារៀងរាល់ឆ្នាំនៅរដូវប្រាំង ដែលភាគច្រើនបង្កចេញពីការឆ្ការរុករានព្រៃធ្វើកសិកម្ម និងដុតព្រៃរកសត្វរបស់ពលរដ្ឋ។ ភ្លើងឆេះព្រៃនេះ បានធ្វើឱ្យប៉ះពាល់យ៉ាងធ្ងន់ធ្ងរដល់ទ្រព្យសម្បត្តិពលរដ្ឋ សេដ្ឋកិច្ចជាតិ ពិសេសការបាត់បង់ធនធានព្រៃឈើ ជីវៈចម្រុះថែមទៀត។
ជុំវិញបញ្ហានេះ ក្រសួងកសិកម្ម នៅថ្ងៃទី១០មករា បានណែនាំឱ្យមន្រ្តីជំនាញគ្រប់រាជធានីខេត្ត និងសហគមន៍ព្រៃឈើ ឬសហគមន៍កសិកម្មផ្សេងៗ ចូលរួមទប់ស្កាត់ការប្រើប្រាស់ភ្លើងជាមធ្យោបាយ ដើម្បីយកឃ្មុំ ការដុតស្ទាក់ចាប់សត្វ និងការដុតវាលស្មៅ យកល្បាស់ធ្វើចំណីសត្វពាហនៈជាដើម។ ក្រសួងក៏ណែនាំឱ្យទប់ស្កាត់ការកាប់ឆ្ការ គាស់រាន ឈូសឆាយ ដុតព្រៃឈើ និងព្រៃលិចទឹកដើម្បីពង្រីកផ្ទៃដីដំណាំកសិកម្ម ដែលនាំឱ្យមានភ្លើងឆេះព្រៃឈើ ព្រៃលិចទឹក និងរាលដាលរហូតដល់ស្រូវ ឬភូមិពលរដ្ឋ ។
ការរុករកផល អនុផលព្រៃឈើជាប្រពៃណី និងសកម្មភាពផ្សេងទៀត ដែលចាំបាច់ត្រូវប្រើភ្លើងជាមធ្យោបាយ ដូចជា ដុតរណ្តៅជ័រ គឺត្រូវណែនាំឱ្យពន្លត់ មុនពេលចាកចេញពីដើមឈើឡោះព័រ ឬទីតាំងដែលប្រើភ្លើងទាំងនោះ។ ក្នុងករណីចាំបាច់ដែលត្រូវប្រើភ្លើងជាមធ្យោបាយក្នុងការដុតកាកសំណល់ ក្រោមគោលបំណង ដាំដំណាំកសិកម្ម និងសកម្មភាពស្របច្បាប់ផ្សេងទៀត ត្រូវជូនដំណឹងដល់មន្ទីរកសិកម្ម ដើម្បីណែនាំអនុវត្តវិធានការបច្ចេកទេស ចំពោះភ្លើងព្រៃ។
ក្នុងករណីកើតមានភ្លើងឆេះព្រៃ ត្រូវប្រញាប់ចាត់វិធានការទប់ស្កាត់ជាបន្ទាន់។ គណៈបញ្ជាការឯកភាពរាជធានី ខេត្ត ត្រូវដឹកនាំបញ្ជាផ្ទាល់ក្នុងការប្រើកម្លាំងប្រដាប់អាវុធ ពលរដ្ឋ សហគមន៍ សិស្សានុសិស្ស និងព្រះសង្ឃ ដែលឈរជើងនៅក្នុងមូលដ្ឋាននោះ ដើម្បីរួមគ្នាទប់ស្កាត់ និងពន្លត់ភ្លើងព្រៃ។ ក្រសួងស្នើឱ្យភាគីពាក់ព័ន្ធត្រូវសហការជាមួយអាជ្ញាធរដែនដី ក្នុងការហាមឃាត់ចូលកាន់កាប់ប្រើប្រាស់ដីព្រៃឈើ និងព្រៃលិចទឹកដែលឆេះរួច ដើម្បីទុកលទ្ធភាពរុក្ខជាតិដុះឡើងវិញ តាមលក្ខណៈធម្មជាតិ។
មិនតែប៉ុណ្ណោះ ជនណា ដែលបានប្រព្រឹត្ត ឬបង្កឱ្យមានភ្លើងឆេះព្រៃឬភ្លើងឆេះព្រៃលិចទឹកដោយចេតនា ត្រូវផ្តន្ទាទោសក្រោមបទល្មើសព្រៃឈើ ថ្នាក់ទី១ ឬបទល្មើសជលផលថ្នាក់ទី១ ដែលត្រូវជាប់ពន្ធនាគារពី៥ឆ្នាំ ទៅ១០ឆ្នាំ ឬពី ៣ឆ្នាំទៅ ៥ឆ្នាំ៕
Tag:
ក្រសួងកសិកម្ម
ភ្លើងឆេះព្រៃ
© រក្សាសិទ្ធិដោយ thmeythmey.com
