អ្នកស៊ើបអង្កេតសិទ្ធិមនុស្សរបស់អង្គការសហប្រជាជាតិ (UN) នៅថ្ងៃទី១០ ខែមករា បានអំពាវនាវឱ្យយោធាមីយ៉ាន់ម៉ាបញ្ឈប់ការវាយប្រហារលើទីប្រជុំជន Loikaw និងដកបម្រាមបិទផ្លូវពលរដ្ឋដែលព្យាយាមរត់ភៀសខ្លួន។ បើតាម UN អ្នកស្រុកនៅទីប្រជុំជន Loikaw កំពុងប្រឈមមុខការបាញ់ផ្លោង និងការវាយប្រហារតាមអាកាសពីក្រុមយោធា។
ទីក្រុង Loikaw ដែលជាទីក្រុងធំរបស់រដ្ឋ Kayah ភាគខាងកើតមីយ៉ាន់ម៉ា មានព្រំប្រទល់ជាប់ប្រទេសថៃ ជាតំបន់ដែលតែងតែមានការប៉ះទង្គិចគ្នារវាងក្រុមយោធា និងក្រុមប្រឆាំងនឹងរដ្ឋប្រហារជាហូរហែ។ ចាប់តាំងពីសប្តាហ៍មុនមក យោធាបានបើកការវាយប្រហារតាមអាកាស និងបាញ់កាំភ្លើងធំលើទីក្រុងនេះ។ ភាពវឹកវរនេះ បានបង្ខំឱ្យអ្នកស្រុកជាច្រើនពាន់នាក់រត់ភៀសខ្លួន។
នៅក្នុងសារដែលបានបង្ហោះលើបណ្ដាញសង្គមTwitter លោក Thomas Andrews អ្នករាយការណ៍ពិសេសរបស់ UN បានប្រាប់ឱ្យមេដឹកនាំរដ្ឋប្រហារ មីន អ៊ុងឡាំង ត្រូវតែបញ្ឈប់ជាបន្ទាន់ការវាយប្រហារតាមផ្លូវអាកាស និងផ្លូវគោកលើទីក្រុង Loikaw។ លោកក៏បានអំពាវនាវឱ្យដកចេញបម្រាមបិទផ្លូវដែលរារាំងពលរដ្ឋមិនឱ្យភៀសខ្លួនចេញពីតំបន់នោះ។ ទាក់ទិននឹងរឿងជំនួយមនុស្សធម៌វិញ លោកស្នើឱ្យក្រុមយោធាអនុញ្ញាតឱ្យជំនួយមនុស្សធម៌ហូរចូលក្នុងប្រទេសផងដែរ។
ប្រជាពលរដ្ឋម្នាក់នៅទីក្រុង Loikaw ប្រាប់ទីភ្នាក់ងារព័ត៌មាន Reuters ថា ការវាយប្រហារនៅតាមជាយក្រុង បានបង្កការលំបាកដល់ប្រជាជនដើម្បីភៀសខ្លួន។ «ខ្ញុំបានត្រៀមចិត្តថាខ្ញុំអាចនឹងស្លាប់»។ នេះជាសម្តីរបស់ពលរដ្ឋដដែលដែលសុំមិនបញ្ចេញអត្តសញ្ញាណបានលើកឡើង ក្រោយការបាញ់ប្រហារហាក់គ្មានភាពស្ងប់ស្ងាត់។
បើតាមសេចក្តីថ្លែងការណ៍មួយរបស់កងកម្លាំងការពារជាតិការ៉េន (KNDF) កងកម្លាំងប្រឆាំងយោធានៅក្នុងតំបន់ បានបាញ់ទម្លាក់ឧទ្ធម្ភាគចក្រកងទ័ព និងបានសម្លាប់ទាហានប្រហែល៣០នាក់នៅទីក្រុង Loikaw ។ លើសពីនេះទៀត កងកម្លាំងប្រឆាំងក៏បានលើកឡើងថា ទាហានប្រាំបីនាក់ផ្សេងទៀតត្រូវបានសម្លាប់នៅក្នុងទីក្រុង Demoso ក្បែរនោះផងដែរ។
មីយ៉ាន់ម៉ាបានស្ថិតក្នុងភាពចលាចលចាប់តាំងពីយោធាបានផ្តួលរំលំរដ្ឋាភិបាលជាប់ឆ្នោតរបស់លោកស្រី អ៊ុងសាន ស៊ូជី កាលពីខែកុម្ភៈកន្លងទៅ។ រដ្ឋប្រហារនេះបានបង្កឱ្យមានការតវ៉ាអស់ជាច្រើនខែ និងការបង្រ្កាបយ៉ាងឃោរឃៅពីក្រុមយោធា។
ចាប់តាំងពីរដ្ឋប្រហារមក មនុស្សជាង១៤០០នាក់ត្រូវបានសម្លាប់ និងជាង១ម៉ឺននាក់ត្រូវបានចាប់ខ្លួនដោយកងកម្លាំងរក្សាសន្តិសុខដើម្បីរារាំងការតវ៉ា។ នេះបើយោងតាមទិន្នន័យពីសមាគមសិទ្ធិមនុស្សផ្តល់ជំនួយដល់អ្នកទោសនយោបាយនៅមីយ៉ាន់ម៉ា។
គួររំលឹកថា ថ្មីៗនេះក្រោយកិច្ចជំនួបជាមួយនាយករដ្ឋមន្រ្តីកម្ពុជា សម្តេចតេជោ ហ៊ុន សែន និងជាប្រធានផ្លាស់វេនរបស់អាស៊ាន លោកឧត្តមសេនីយ៍ មីន អ៊ុងឡាំង បានសន្យាសម្រេចពន្យារបទឈប់បាញ់ជាមួយអង្គការប្រដាប់អាវុធជនជាតិភាគតិចទាំងអស់រហូតដល់ចុងឆ្នាំ២០២២នេះ៕