ថ្លែងពីទឹកដីអូស្រ្តាលី រដ្ឋមន្រ្តីការបរទេសអង់គ្លេស លោកស្រី Liz Truss បានបញ្ជាក់ថាអង់គ្លេស និងសម្ព័ន្ធមិត្តផ្សេងទៀតដែលស្ថិតក្នុងលោកសេរី ត្រូវតែឆ្លើយតបរួមគ្នាប្រឆាំងទៅនឹងការគំរាមកំហែងជាសកល ពង្រឹងទំនាក់ទំនងជាមួយប្រទេសប្រកាន់របបប្រជាធិបតេយ្យនៅតំបន់ឥណ្ឌូប៉ាស៊ីហ្វិក និងផ្ជាញ់ប្រទេសផ្តាច់ការ ដែលគឃ្លើនប្រើសេដ្ឋកិច្ចជាឧបករណ៍បម្រើផលប្រយោជន៍ខ្លួន។

 

«ប្រទេសផ្តាច់ការ កាន់តែប្រើអំណាចខ្លាំងឡើង ដែលយើងមិនធ្លាប់ឃើញពីមុនមក តាំងពីសង្រ្គាមត្រជាក់»។ លោកស្រី Truss ថ្លែងបែបនេះនៅក្នុងសុន្ទរកថានៅថ្ងៃទី២១ ខែមករា។ ការលើកឡើងរបស់រដ្ឋមន្រ្តីការបរទេសអង់គ្លេសបែបនេះ ទំនងសំដៅទៅលើចិន និងរុស្ស៊ី ដែលព្យាយាមពង្រីកឥទ្ធិពលនៃរបបផ្តាច់ការនៅជុំវិញពិភពលោក។  នេះជាមូលហេតុដែលរបបផ្តាច់ការនៅ បេឡារុស កូរ៉េខាងជើង និងមីយ៉ាន់ម៉ា មានទំនាក់ទំនងជិតស្និទ្ធបំផុតជាមួយរុស្ស៊ី និងចិន។

 

ទន្ទឹមនឹងនេះ ក្នុងសេចក្តីថ្លែងការណ៍រួមមួយរវាង រដ្ឋមន្រ្តីអង់គ្លេស និងរដ្ឋមន្រ្តីអូស្រ្តាលី បានបង្ហាញពីការព្រួយបារម្ភជុំវិញការកើនឡើងនៃកងកម្លាំងយោធារុស្ស៊ីនៅក្បែរព្រំដែនអ៊ុយក្រែន។ បន្ថែមពីនេះ រដ្ឋមន្រ្តីប្រទេសទាំងពីរក៏បានបង្ហាញពីការគាំទ្រយ៉ាងពេញទំហឹងចំពោះអធិបតេយ្យភាព និងបូរណភាពទឹកដីរបស់អ៊ុយក្រែនផងដែរ។

 

ក្នុងសេចក្តីថ្លែងការណ៍ដដែល លោកស្រី Truss បានព្រមានលោក ពូទីនឱ្យដកខ្លួនចេញឱ្យឆ្ងាយពីបញ្ហានៅអ៊ុយក្រែនមុនពេលសាងកំហុសដ៏ធំ។ កន្លងមកអង់គ្លេស អាម៉េរិកនិងសម្ព័ន្ធមិត្តធ្លាប់ព្រមានរុស្ស៊ីថានឹងប្រឈមទណ្ឌកម្មធ្ងន់ធ្ងរ បើហ៊ានឈ្លានពានអ៊ុយក្រែន។ 

 

ទាក់ទងនឹងចិន ប្រមុខការទូតអង់គ្លេសរូបនេះ បានលើកឡើងថា ការដំឡើងពន្ធរបស់ចិនលើទំនិញអូស្រ្តាលី ក្រោយទីក្រុងកង់បេរ៉ាអំពាវនាវឱ្យមានការស៊ើបអង្កេតពីប្រភពនៃជំងឺកូវីដ១៩ ជាការក្រើនរំលឹកដល់អង់គ្លេសថា ចិនកំពុងប្រើប្រាស់អំណាចសេដ្ឋកិច្ចគៀបសង្កត់លើប្រទេសដទៃ។ 

 

គួរបញ្ជាក់ថា លោកស្រី Truss និងរដ្ឋមន្ត្រីការពារជាតិអង់គ្លេស Ben Wallace បានជួបពិភាក្សាជាមួយសមភាគីអូស្ត្រាលី Peter Dutton នៅទីក្រុងស៊ីដនីពាក់ព័ន្ធនឹងកិច្ចប្រជុំរដ្ឋមន្រ្តីប្រចាំឆ្នាំ (AUKMIN) ស្តីពីកិច្ចព្រមព្រៀងទិញនាវាមុជទឹកដើរដោយថាមពលនុយក្លេអ៊ែររវាង អូស្ត្រាលី អង់គ្លេស និងអាម៉េរិក៕