កោះតៃវ៉ាន់បានត្អូញត្អែរសឹងរេចមាត់ទៅហើយអំពីបំពានរបស់កងទ័ពអាកាសរបស់ចិនក្នុងតំបន់ការពារអាកាសរបស់ខ្លួន ពិសេសតំបន់ក្បែរកោះ Pratas ដែលនៅមិនឆ្ងាយពីដីគោក។ នៅថ្ងៃទី២៣ ខែមករា​ ក្រសួងការពារជាតិតៃវ៉ាន់ ប្រកាសថា យន្តហោះចម្បាំង៣៩គ្រឿង បានចូលបំពានតំបន់នេះជាថ្មី។

 

ក្នុងសេចក្ដីប្រកាសរបស់ខ្លួន ក្រសួងការពារជាតិតៃវ៉ាន់ និយាយថា បេសកកម្មរបស់ចិនមានយន្តហោះ​ចម្បាំងចំនួន៣៤គ្រឿង យន្តហោះចម្បាំងអេឡិចត្រូនិក៤គ្រឿង និងព្រមទាំង យន្តហោះទម្លាក់​គ្រាប់​បែក១គ្រឿងផងដែរ។ បើ​តាម​ផែនទី​ដែល​ក្រសួង​ការពារជាតិតៃវ៉ាន់បញ្ចេញ ​យន្តហោះ​ទាំងនោះបាន​ហោះ​ហើរ​នៅភាគ​ឦសាន​នៃកោះ Pratas ។ 

 

ដូចសព្វដងដែរ ក្រសួងការពារជាតិតៃវ៉ាន់បានបញ្ជាក់ថា ខ្លួនបានបញ្ជូនយន្តហោះចម្បាំងទៅព្រមាន​យន្តហោះចិន ខណៈប្រព័ន្ធមីស៊ីលត្រូវបានដាក់ប្រុងជើងការដើម្បីតាមដានសកម្មភាពរបស់យន្តហោះចម្បាំងចិន។

 

ចិន មិនទាន់បានឆ្លើយតបយ៉ាងណាឡើយជុំវិញរឿងនេះ។ កន្លងមកទីក្រុងប៉េកាំងតែងប្រកាសថា វត្តមានយន្តហោះចម្បាំងនេះ ជាការការពារ​អធិបតេយ្យភាព​តែប៉ុណ្ណោះ។ ប៉ុន្តែការហោះហើរពេលនេះ ធ្វើឡើងស្របពេលទ័ពជើងទឹកអាម៉េរិកនិងជប៉ុន កំពុងធ្វើសមយុទ្ធនៅសមុទ្រ​ហ្វីលីពីនដែលជាតំបន់​ដ៏​ធំបញ្ចូលដែនទឹកភាគខាងកើតតៃវ៉ាន់ដែរ។ បើតាមកងនាវាចរណ៍ប្រចាំតំបន់​ប៉ាស៊ីហ្វិក​របស់​អាម៉េរិក សមយុទ្ធទាំងនោះរួមមាន​ក្រុមនាវា​ផ្ទុកយន្តហោះចំនួន​ពីរដែល​កំពុងហ្វឹកហ្វឺនការពារ​តំបន់​ឥណ្ឌូ​ប៉ាស៊ី​ហ្វិកសេរី និងបើកចំហ។

 

មួយរយៈចុងក្រោយ ចិន​បាន​បង្កើន​សម្ពាធខ្លាំង​លើ​តៃវ៉ាន់​ឱ្យ​ទទួល​យក​ការទាមទារ​អធិបតេយ្យភាព​របស់ខ្លួន។ រីឯរដ្ឋាភិបាលតៃវ៉ាន់ឯណោះអះអាងថា ខ្លួនចង់បានតែសន្តិភាព ប៉ុន្តែ នឹងការពារខ្លួន​ប្រសិន​បើត្រូវបានវាយប្រហារ៕