របាយការណ៍ប្រចាំឆ្នាំរបស់ក្រសួងដែនដី នគរូបនីយកម្ម និងសំណង់ បង្ហាញថា កាលពីឆ្នាំ២០២១ យន្តការដោះស្រាយវិវាទដីធ្លី ទទួលបានពាក្យបណ្តឹងសរុប៣៩២ករណី ដោយដោះស្រាយបញ្ចប់នីតិវិធីចំនួន២០២ករណី។
យន្តការដោះស្រាយវិវាទដីធ្លីនៅកម្ពុជា មាន៣ រួមមានយន្តការគណៈកម្មការសុរិយោដីក្រុង ស្រុក ខណ្ឌ, ការដោះស្រាយដោយក្រុមការងារក្រសួងដែនដី នគរូបនីយកម្ម និងសំណង់ និងការដោះស្រាយរបស់អាជ្ញាធរជាតិដោះស្រាយទំនាស់ដីធ្លី។
របាយការណ៍កាលពីឆ្នាំ២០២១ បានបង្ហាញថា ក្នុងចំណោមបណ្តឹង៣៩២ករណី គណៈកម្មការសុរិយោដីទទួលបាន១៦៥ករណី ដោយដោះស្រាយបញ្ចប់នីតិវិធីចំនួន១៣៩ករណី (បញ្ចប់ស្ថាពរ៥៧ករណី, ច្រានចោលបណ្តឹង៥៤ករណី និងភាគីសុំដកពាក្យបណ្តឹង២៨ករណី)។
ពីឆ្នាំ២០០៤ ដល់ខែធ្នូ ឆ្នាំ២០២១ គណៈកម្មការសុរិយោដី បានបញ្ចប់វិវាទពាក់ព័ន្ធនឹង ២៣ ២៩៧គ្រួសារ ស្មើនឹងផ្ទៃដីទំហំជិត៦៦០០ហិកតា។
រីឯការដោះស្រាយវិវាទដីធ្លីដោយក្រុមការងារក្រសួងដែនដីវិញ មានបណ្តឹង៥៥ករណី ក្នុងចំណោម២១១ករណី ត្រូវបានដោះស្រាយ។ ជាមួយគ្នានេះ បណ្តឹងចប់ជាស្ថាពរ មាន៤២ករណី ការធ្វើលិខិតឆ្លើយតបទៅម្ចាស់បណ្តឹង និងបង្វែរទៅសមត្ថកិច្ចពាក់ព័ន្ធចំនួន១៣ករណី។
ពីឆ្នាំ២០១៦ ដល់ឆ្នាំ២០២១ ក្រសួងទទួលបានករណីវិវាទជិត២៩០០ករណី ដោយដោះស្រាយបាន៦០០ករណី (បញ្ចប់ស្ថាពរជាង៣០០ករណី, ការធ្វើលិខិតឆ្លើយតបទៅម្ចាស់បណ្តឹង និងបង្វែរទៅសមត្ថកិច្ចពាក់ព័ន្ធចំនួនជិត៣០០ករណី) និងកំពុងដោះស្រាយជិត២៣០០ករណី។
ងាកទៅអាជ្ញាធរជាតិដោះស្រាយទំនាស់ដីធ្លីវិញ បណ្តឹងដែលទទួលបានមាន១៦ករណី ដោយដោះស្រាយបញ្ចប់ចំនួន៧ករណី និងបង្វែរទៅសាមីសំណើ១ករណី។
បើគិតចាប់តាំងពីផ្តើមអនុវត្តមក អាជ្ញាធរជាតិដោះស្រាយទំនាស់ដីធ្លី ទទួលបានបណ្តឹងជិត២០០០ករណី ដោយដោះស្រាយបានជាង១៨០០ករណី និងកំពុងដោះស្រាយជាង១៥០ករណី។
លទ្ធផលជារួមបង្ហាញថា យន្តការដោះស្រាយវិវាទដីធ្លី ទទួលបានបណ្តឹង៣៩២ករណីនៅឆ្នាំ២០២១ ដោយបញ្ចប់នីតិវិធីចំនួន២០២ករណី។
សរុបជារួម បើគិតពីការចាប់ផ្តើមការអនុវត្តយន្តការដល់ដល់ដំណាច់ឆ្នាំ២០២១ បណ្តឹងសរុបមានជិត១៤ ០០០ករណី ដោយដោះស្រាយបានជិត១១០០០ករណី និងកំពុងដោះស្រាយជាង៣២០០ករណី៕