ខ្លាឃ្មុំផេនដាដែលមានសម្បុរពណ៌សលាយខ្មៅប្លែកពីពូជខ្លាឃ្មុំដទៃ ជាសម្បត្តិជាតិមួយរបស់ចិន។ មិនត្រឹមជាសម្បត្តិជាតិឡើយ ខ្លាឃ្មុំមួយប្រភេទនេះ ក៏ដើរតួសំខាន់ដែរក្នុងនយោបាយការទូតរបស់ចិនតាមរយៈការឱ្យប្រទេសដទៃខ្ចីសម្រាប់ការតាំងបង្ហាញ ព្រោះខ្លាឃ្មុំនេះមានតែនៅចិនប៉ុណ្ណោះ។ វាក៏ក្លាយជា ការទូតខ្លាឃ្មុំផេនដា (Panda Diplomacy) ដែលត្រូវមើលឃើញថា ជាយុទ្ធសាស្រ្តការទូតមួយដ៏ជោគជ័យដែលចិនបានប្រើប្រាស់ដើម្បីពង្រឹងទំនាក់ទំនងជាមួយប្រទេសផ្សេងៗ។
ការផ្ដល់អំណោយឱ្យគ្នាទៅវិញទៅមក វាមិនមែនជារឿងថ្មីឡើយក្នុងនយោបាយការទូតរវាងប្រទេសនិងប្រទេស។ ដូចកន្លងមក ពពួកសត្វណាដែលមានសារសំខាន់ សម្រាប់ជាតិសាសន៍ណាមួយ ពពួកសត្វនោះនឹងត្រូវផ្សារភ្ជាប់ជាអំណោយការទូត ដែលជាការអនុវត្តយូរយារមក។ ការទូតផេនដា ក៏មិនខុសគ្នា។ ការទូតខ្លាឃ្មុំផេនដា ជាការអនុវត្តនៃការបញ្ជូនខ្លាឃ្មុំផេនដា ពីចិនទៅកាន់ប្រទេសផ្សេងៗ ក្នុងន័យបម្រើនយោបាយការទូតរបស់ចិន។ វាដូចជាការផ្ដល់អំណោយទៅដល់ប្រទេសដៃគូផ្សេងៗ ដើម្បីរឹតចំណងការទូត រវាងប្រទេសនិងប្រទេស។
តើការទូតខ្លាឃ្មុំដាកើតឡើងតាំងពីពេលណាមក? ប្រទេសណាខ្លះដែលបានទទួលអំណោយដ៏សំខាន់នេះពីចិន?
បើនិយាយពីការអនុវត្តនៃការទូតនេះជាលើកដំបូង នោះយើងត្រូវត្រឡប់ទៅមើលតាំងពីរាជវង្សថាង ដែលនៅពេលនោះអធិរាជចិន Wu Zetian បានបញ្ជូនខ្លាឃ្មុំពីរក្បាល ដែលត្រូវបានជឿថា ជាខ្លាឃ្មុំផេនដាទៅជប៉ុន។ យ៉ាងណាមិញ អំណោយខ្លាឃ្មុំផេនដា ត្រូវបានអនុវត្តទៀងទាត់ជាងមុនចាប់ពីឆ្នាំ១៩៥០ ហើយបានក្លាយជានិមិត្តរូបនៃសុច្ឆន្ទ និងមិត្តភាពជាមួយប្រទេសដទៃ។ ស្របពេលនោះ ទីក្រុងប៉េកាំង ក៏បានកំពុងប្រឹងប្រែងពង្រឹងតួនាទីរបស់ខ្លួន លើឆាកអន្តរជាតិផងដែរ។
នៅឆ្នាំ១៩៥៧ ចិនបានផ្ដល់អំណោយខ្លាឃ្មុំផេនដាយក្ស ឈ្មោះ Ping Ping ឱ្យសហភាពសូវៀត ព្រោះសូវៀតបានក្លាយជាប្រទេសដំបូងគេ ដែលបង្កើតទំនាក់ទំនងការទូតជាមួយចិនកុម្មុយនីស្ត។ ប៉ុន្មានខែបន្ទាប់ពីដំណើរទស្សនកិច្ចរបស់ប្រធានាធិបតីអាម៉េរិក Richard Nixon ទៅកាន់ទីក្រុងប៉េកាំងនៅឆ្នាំ១៩៧២ ដើម្បីភ្ជាប់ទំនាក់ទំនងការទូត អាម៉េរិកបានទទួលខ្លាឃ្មុំផេនដាដ៏ធំដំបូង ឈ្មោះ Hsing Hsing និង Ling Ling ។ ជាថ្នូរនឹងគ្នា លោក Nixon បានផ្តល់អំណោយគោ musk ពីរ ដល់ចិនវិញ។
កាលនោះ ខ្លាឃ្មុំផេនដា រឹតតែមានប្រជាប្រិយភាពខ្លាំងឡើង ហើយអំណោយរបស់ចិនមួយនេះ ត្រូវបានមើលឃើញថាជាជោគជ័យផ្នែកការទូត ដ៏ធំសម្បើមមួយ។ ក្នុងឆ្នាំ ១៩៧៤ អំឡុងពេលទស្សនកិច្ចទៅកាន់ចិន នាយករដ្ឋមន្ត្រីអង់គ្លេស Edward Heath បានស្នើសុំខ្លាឃ្មុំផេនដា ពីចិនយកចក្រភពអង់គ្លេសវិញ។
ការទូតខ្លាឃ្មុំផេនដា បានបន្តយ៉ាងសកម្មរហូតដល់ទសវត្សរ៍ឆ្នាំ១៩៨០ ។ អំឡុងពេលនោះ ខ្លាឃ្មុំផេនដាយក្សចំនួន២៣ក្បាល ត្រូវបានផ្តល់ឱ្យប្រទេសជាច្រើន មានបារាំង ចក្រភពអង់គ្លេស និងជប៉ុនជាដើម។
លែងឱ្យដាច់ តែឱ្យខ្ចីវិញ ព្រោះចំនួនផេនដាធ្លាក់ចុះ
ខណៈចំនួនសត្វខ្លាឃ្មុំផេនដា ដែលនៅមាននៅចិនបានជួបការគំរាមកំហែង រដ្ឋាភិបាលចិន បានប្តូរពីការផ្តល់អំណោយទៅជាការខ្ចីវិញ។ នៅឆ្នាំ១៩៨៤ មេដឹកនាំចិន តេង ស៊ាវភីង បានឱ្យខ្លាឃ្មុំផេនដាពីរក្បាល ដល់ទីក្រុង Los Angeles អំឡុងព្រឹត្តិការណ៍កីឡាអូឡាំពិកឆ្នាំ១៩៨៤ ក្រោមតម្លៃ៥ម៉ឺនដុល្លារក្នុងមួយខែ សម្រាប់ខ្លាឃ្មុំផេនដាមួយក្បាល។
ការអនុវត្តនេះ ត្រូវបានកែប្រែម្តងទៀតក្នុងឆ្នាំ១៩៩១ ដើម្បីផ្តល់ការកម្ចីរយៈពេលវែង។ ចិន ចាប់ផ្តើមផ្តល់សត្វខ្លាឃ្មុំផេនដា ដល់ប្រទេសផ្សេងទៀតដល់ដប់ឆ្នាំ។ លក្ខខណ្ឌកម្ចីស្ដង់ដាររួមមានថ្លៃសេវារហូតដល់១លានដុល្លារ ក្នុងមួយឆ្នាំ ហើយកូនខ្លាឃ្មុំផេនដា ដែលកើតក្នុងអំឡុងពេលកម្ចី ក្លាយជាកម្មសិទ្ធិរបស់សាធារណរដ្ឋប្រជាមានិតចិនដដែល។
ការរៀបចំថ្មីនេះ ស្តាប់ទៅដូចជាការរកស៊ីច្រើនជាងការពង្រឹងទំនាក់ទំនងការទូត។ យ៉ាងណាមិញ ចិនមិនមែនធ្វើបែបនេះតែឯងនោះទេ។ ក្នុងឆ្នាំ២០១៥ អូស្ត្រាលីបានឱ្យខ្លាឃ្មុំ Koala ៤ក្បាល ទៅសិង្ហបុរីខ្ចី ដើម្បីប្រារព្ធខួប៥០ឆ្នាំនៃទំនាក់ទំនងការទូតផងដែរ។
សម្រាប់ចិន យុទ្ធសាស្ត្រខ្លាឃ្មុំផេនដា បានផ្តល់លទ្ធផលវិជ្ជមានទាំងផ្នែកការទូត និងទាំងការលើកកម្ពស់ការយល់ដឹង ពីការអភិរក្សសត្វដ៏សំខាន់មួយនេះ។ ប្រាក់មូលនិធិមួយចំណែកធំដែលរកបាន តាមរយៈគម្រោងប្រាក់កម្ចីនេះ បានចំណាយលើការកែលម្អជម្រកឫស្សីធម្មជាតិ និងគាំទ្រកម្មវិធីបង្កាត់ពូជសត្វខ្លាឃ្មុំផេនដា របស់ចិនផងដែរ។ សព្វថ្ងៃនេះ ខ្លាឃ្មុំផេនដា មានវត្តមានក្នុងប្រទេសចំនួន២០ហើយ ការឱ្យខ្ចីខ្លាឃ្មុំផេនដាថ្មីៗបំផុតនេះ គឺក្នុងឆ្នាំ ២០១៩ ដែលដាណឺម៉ាក ទទួលបានសត្វខ្លាឃ្មុំផេនដាមួយគូ។
ប្រទេសដែលទទួលបានខ្លាឃ្មុំផេដា ក៏បានទទួលផលប្រយោជន៍យ៉ាងច្រើន ក្នុងរយៈពេលជាច្រើនឆ្នាំមកនេះ ជាពិសេសទាក់ទងនឹងចំនួនអ្នកទស្សនា ដែលត្រូវបានទាក់ទាញដោយសត្វដ៏គួរឱ្យស្រឡាញ់មួយនេះ៕