នៅពេលដែលការប្រឈមមុខជាមួយលោកខាងលិចនៅតែឡើងកម្ដៅ ប្រធានាធិបតីរុស្ស៊ី វ៉ា្លឌីមៀ ពូទីន ហោះទៅកាន់រដ្ឋធានីប៉េកាំងដើម្បីជួបប្រធានាធិបតីចិន ស៊ី ជិនភីង និងចូលរួមបើកព្រឹត្តិការណ៍អូឡាំពិករដូវរងាឆ្នាំ២០២២។ ក្រោយជំនួបទល់មុខគ្នា មេដឹកនាំចិន និងរុស្ស៊ីចេញសេចក្ដីថ្លែងការណ៍មួយដោយបញ្ជាក់ពីទំនាក់ទំនងគ្មានដែនកំណត់ និងប្រកាសជំហររួមប្រឆាំងសកម្មភាពរបស់អាម៉េរិកនៅអឺរ៉ុបខាងកើត និងជុំវិញពិភពលោក។

 

«មេដឹកនាំទាំងពីរប្រឆាំងការពង្រីកបន្ថែមទៀតសម្ព័ន្ធយោធាណាតូដែលដឹកនាំដោយអាម៉េរិក និងស្នើឱ្យសម្ព័ន្ធភាពនេះបោះបង់គំនិតសម័យសង្រ្គាមត្រជាក់។» សេចក្ដីថ្លែងការណ៍រួមមេដឹកនាំចិន និងរុស្ស៊ីបញ្ជាក់បែបនេះ មុនបន្តថា ប្រទេសទាំងពីរបារម្ភពីការទៅមុខនៃផែនការអភិវឌ្ឍប្រព័ន្ធការពារមីស៊ីល និងការពង្រាយគ្រឿងបរិក្ខារប្រព័ន្ធការពារនេះនៅតាមតំបន់ជាច្រើនលើពិភពលោក គួបផ្សំនឹងការពង្រឹងសមត្ថភាពអាវុធយុទ្ធសាស្រ្តឯទៀត។

 

បើតាមឯកសារដដែល រុស្ស៊ីក៏បញ្ជាក់ជាថ្មីការគាំទ្រគោលនយោបាយចិនតែមួយ ហើយចាត់ទុកតៃវ៉ាន់ជាផ្នែកមួយមិនអាចបំបែកបានរបស់ចិន និងជំទាស់ការប៉ុនប៉ងប្រកាសឯករាជ្យរបស់តៃវ៉ាន់។ ឯចិនវិញគាំទ្រការទាមទាររបស់រុស្ស៊ីដែលចង់បានកិច្ចព្រមព្រៀងមួយធានាថា ណាតូត្រូវបំពេញតម្រូវការសន្តិសុខរបស់រុស្ស៊ីនៅតំបន់អឺរ៉ុប។

 

សេតវិមានឯណោះវិញ ហាក់មិនបារម្ភអ្វីនឹងជំនួបមេដឹកនាំប្រទេសមហាអំណាចពីរដែលកំពុងមើលមុខគ្នាមិនត្រូវជាមួយអាម៉េរិកឡើយ។ នៅពេលសួរពីជំនួបលោក ស៊ី និងលោក ពូទីន ក្នុងសន្និសីទសារព័ត៌មាន អ្នកនាំពាក្យសេតវិមាន Jen Psaki ឆ្លើយតាមសម្រួលថា ប្រធានាធិបតី ចូ បៃឌិន ក៏មានទំនាក់ទំនងផ្ទាល់មួយជាមួយលោក ស៊ី ដែរ ហើយអ្វីដែលអាម៉េរិកកំពុងផ្ចង់អារម្មណ៍ គឺការធ្វើការជាមួយសម្ព័ន្ធមិត្តក្នុងករណីរុស្ស៊ីឈ្លានពានអ៊ុយក្រែន។

 

អំឡុងទស្សនកិច្ចនេះ លោក ពូទីន ក៏ប្រកាសកិច្ចព្រមព្រៀងផ្គត់ផ្គង់ឧស្ម័ន និងប្រេងឱ្យចិនបន្ថែមទៀតជាមួយតម្លៃរាប់សិបពាន់លានដុល្លារ។ ការទិញលក់នឹងធ្វើជាប្រាក់អឺរ៉ូ មិនមែនដុល្លារឡើយ៕