ព្រះពុទ្ធបដិមាមួយចំនួន នៅរួតបាកាណនៃប្រាសាទអង្គរវត្ត រងការខូចខាតដោយសារធម្មជាតិ ជ្រាបទឹក ទឹកហូរច្រោះ ទឹកនោម និងលាមកសត្វប្រចៀវជាដើម។ បន្ទាបពីសិក្សាពការខូចខាត អាជ្ញាធរជាតិអប្សរា បានសហការជាមួយវិស័យឯកជន បន្តជួសជុលព្រះពុទ្ធបដិមា ៣ព្រះអង្គទៀត បន្ទាប់ពីព្រះពុទ្ធបដិមា ១អង្គ បានជួសជុលរួចរាល់កាលពីឆ្នាំ ២០២០។ 

ជាមួយគ្នានេះ អ្នកជំនាញក៏បានរើសំណាញ់ចាស់ចោល ដាក់សំណាញ់ថ្មី ដើម្បីកុំសត្វប្រចៀវចូល។ លោក សយសុភារិន្ទ មន្រ្តីបច្ចេកទេសនាយកដ្ឋានអភិរក្សប្រាសាទក្នុងឧទ្យានអង្គរ បានលើកឡើងថាអ្នកជំនាញគ្រោងប្រើពេល៥ខែ ចាប់ពីខែកុម្ភៈ ឆ្នាំ២០២២ ដើម្បីជួសជុលព្រះពុទ្ធបដិមា ៣អង្គនៅរួតបាកាណនៃប្រាសាទអង្គរវត្ត។

សូមជម្រាបដែរថា កាលពីថ្ងៃទី២៥ខែវិច្ឆិកា ឆ្នាំ២០២០ អ្នកជំនាញអភិរក្សចម្លាក់នៃអាជ្ញាធរជាតិអប្សរាបានជួសជុលព្រះពុទ្ធបដិមាមួយព្រះអង្គនៅទិសខាងត្បូងនៃកំពូលប្រាសាទអង្គរវត្ត៕