ជាតិ
សណ្ឋាគារវិរតន៍ ទទួលបានការវាយតម្លៃខ្ពស់ជាងគេនៅសៀមរាប ក្នុងBooking.com
× សណ្ឋាគារវិរតន៍ ទទួលបានការវាយតម្លៃ ៩. ៧ ក្នុងចំណោមពិន្ទុពេញ១០ លើគេហទំព័រ Booking.com ដែលជាគេហទំព័រភ្នាក់ងារទេសចរណ៍។ ការវាយតម្លៃនេះបានមកពីការចែករំលែកបទពិសោធន៍របស់ភ្ញៀវ ដែលធ្លាប់ស្នាក់នៅសណ្ឋាគារនេះកន្លងមក។
វិរតន៍ ជាសណ្ឋាគារនៅកណ្ដាលក្រុងសៀមរាប ដែលជាសណ្ឋការមានទេសភាពបៃតង និងបរិយាកាសល្អ ។ តាមរយៈការចែករំលែកបទពិសោធន៍ និងការវាយតម្លៃរបស់ភ្ញៀវទេសចរចំនួន ៤៣៨នាក់ នៅលើគេហទំព័រ Booking.com ធ្វើឱ្យសណ្ឋាគារវិរតន៍ ជាប់ជា Traveler Review Awards 2022។ សណ្ឋាគារវិរតន៍ ទទួលបានការវាយតម្លៃ រហូតដល់៩,៧ ជាពិន្ទុខ្ពស់ជាងគេក្នុងចំណោមសណ្ឋាគារដទៃនៅខេត្តសៀមរាប។
លោក សាយ សុខរស់ អ្នកគ្រប់គ្រងទូទៅនៅសណ្ឋាគារវិរតន៍ បានប្រាប់សារព័ត៌មានThmeyThmeyថា ការវាយតម្លៃនៅលើគេហទំព័រ Booking.com សុក្រឹតភាពបំផុត ព្រោះភ្ញៀវទេសចរដែលធ្លាប់ស្នាក់នៅសណ្ឋាគារវីរតន៍ ជាអ្នកដាក់ពិន្ទុតាមរយៈបទពិសោធស្នាក់នៅរបស់ពួកគេ។
« ការដាក់ពិន្ទុគឺផ្ដោតលើការ Review (វាយតម្លៃ) របស់ភ្ញៀវ។ បើសិនមានការវាយតម្លៃ ចំ ណុចណាមិនល្អ ក៏ពិន្ទុរបស់សណ្ឋាគារធ្លាក់ចុះដែរ។ មូលហេតុដែលយើងទទួលបានការពេញចិត្តពីភ្ញៀវច្រើន គឺសណ្ឋាគារយើងរក្សាគុណភាព ជាពិសេសយើងមិនដែលបិទ ដូច្នេះការរៀបចំ និងសេវាកម្មយើងនៅរក្សាបានល្អ»។ នេះជាការបញ្ជាក់របស់លោក សាយ សុខរស់។
សូមជម្រាបផងដែរថា កាលពីឆ្នាំ ២០១៩ សណ្ឋាគារវិរតន៍ ជាប់ជម្រើសរបស់ទេសចរ Trip Advisor’s Travelers’ Choice Awards—Best of the Best លើពិភពលោក។ ក្នុងឆ្នាំ ២០២០ សណ្ឋាគារវិរតន៍ បានជាប់លេខមួយ ជាជម្រើសសណ្ឋាគារល្អបំផុត (Travelers Choice) ក្នុងតំបន់អាស៊ី និងពិភពលោក ដោយភ្នាក់ងារទេសចរណ៍ Trip Advisor ៕
© រក្សាសិទ្ធិដោយ thmeythmey.com