កីឡាជាតិ
ជាតិ
លោក ខៀវ កាញារីទ្ធ ណែនាំមន្ត្រីសិក្សាបច្ចេកទេសផ្សព្វផ្សាយស៊ីហ្គេមពីភាគីវៀតណាម ប្រភពរូបថត៖ ក្រសួងព័ត៌មាន
× ក្នុងកិច្ចប្រជុំថ្នាក់ដឹកនាំក្រសួងព័ត៌មាន កាលពីថ្ងៃទី៧ ខែកុម្ភៈ ឆ្នាំ២០២២ លោករដ្ឋមន្ត្រី ខៀវ កាញារីទ្ធ បានជំរុញឲ្យមានកិច្ចសហការជាមួយភាគីវៀតណាម ដើម្បីទទួលបានបទពិសោធន៍ផ្សព្វផ្សាយ ព្រឹត្តិការណ៍កីឡាស៊ីហ្គេមឲ្យរលូន និងប្រកបដោយគុណភាព។
«នៅឆ្នាំ២០២២នេះ វៀតណាម គឺជាម្ចាស់ផ្ទះស៊ីហ្គេមលើកទី៣១ ដូច្នេះដើម្បីទទួលបានបទពិសោធន៍ នៃការផ្សព្វផ្សាយឲ្យបានល្អ ប្រកបដោយគុណភាព នៅពេលដែលកម្ពុជាធ្វើជាម្ចាស់ផ្ទះ ស៊ីហ្គេមលើកទី៣២ ឆ្នាំ២០២៣ សូមអគ្គនាយកដ្ឋានក្រោមឱវាទក្រសួង ត្រូវសហការជាមួយភាគីវៀតណាម ឲ្យបានស្អិតល្មួត»។ នេះជាការណែនាំរបស់លោក ខៀវ កាញារីទ្ធ។
ខណៈវៀតណាម ត្រូវរៀបចំស៊ីហ្គេមនាដើមខែឧសភា ខាងមុខនេះ លោក ខៀវ កាញារីទ្ធ បានណែនាំដល់ថ្នាក់ ដឹកនាំ អគ្គនាយកដ្ឋានជំនាញ ឲ្យសហការជាមួយភាគីវៀតណាម លើការបញ្ជូនប្រតិភូទៅសិក្សា ស្វែងយល់អំពីបច្ចេកទេស និងដកស្រង់បទពិសោធន៍ ក្នុងការផ្សព្វផ្សាយកិច្ចការប្រកួតកីឡាអាស៊ាន នៅវៀតណាម។
ដូចជាការលើកឡើងរបស់រដ្ឋមន្ត្រីផងដែរ លោក មាស សោភ័ណ្ឌ អ្នកនាំពាក្យក្រសួងព័ត៌មាន បានលើកឡើងពីសារសំខាន់ ក្នុងការបង្កើនកិច្ចសហការជាមួយភាគីវៀតណាម ពីព្រោះប្រទេសជិតខាងមួយនេះ មានបទពិសោធន៍ច្រើន ក្នុងការរៀបចំព្រឹត្តិការណ៍ស៊ីហ្គេម។
គួរបញ្ជាក់ដែរថា កម្ពុជានឹងធ្វើជាម្ចាស់ផ្ទះស៊ីហ្គេមលើកដំបូងបំផុត ក្នុងប្រវត្តិសាស្ត្ររបស់ខ្លួន ដោយកម្មវិធីគ្រោងរៀបចំចាប់ពីថ្ងៃទី ៥-១៧ ខែឧសភា ឆ្នាំ២០២៣ ប្រសិនបើមិនមានការលើកពេល៕
© រក្សាសិទ្ធិដោយ thmeythmey.com