ជាតិ
ឆ្នាំ២០២១ មនុស្សជិត១៥០០នាក់ស្លាប់ដោយគ្រោះថ្នាក់ចរាចរណ៍ ភាគច្រើននៅភ្នំពេញ កណ្តាល និងកំពង់ចាម រូបថត៖ នាយកដ្ឋានសុវត្ថិភាពចរាចរណ៍ផ្លូវគោក
× របាយការណ៍របស់គណៈកម្មាធិការជាតិសុវត្ថិភាពចរាចរណ៍ផ្លូវគោក បានឲ្យដឹងថា ករណីគ្រោះថ្នាក់ចរាចរណ៍ផ្លូវគោកឆ្នាំ២០២១ បានថយចុះ១៦ភាគរយ បើប្រៀបធៀបទៅនឹងឆ្នាំ២០២០ ប៉ុន្តែទោះបីជាយ៉ាងណាក៏ដោយ ចំនួនអ្នកស្លាប់មានជិត១៥០០នាក់ ហើយករណីគ្រោះថ្នាក់ភាគច្រើន បណ្តាលមកពីការបើកបរហួសល្បឿនកំណត់។
នៅឆ្នាំ២០២១ គ្រោះថ្នាក់ចរាចរណ៍ផ្លូវគោក បានកើតឡើងចំនួន២៦៧០ករណី បណ្តាលឲ្យស្លាប់ចំនួន១៤៩៧នាក់ និង របួសចំនួន៣៦១៥នាក់ក្នុងនោះរបួសធ្ងន់ធ្ងរចំនួន២២៤៦នាក់ បើប្រៀបធៀបនឹងឆ្នាំ២០២០ គ្រោះថ្នាក់ បានថយចុះ១៦ភាគរយ។
តាមរបាយការណ៍ អ្នកស្លាប់ដោយគ្រោះថ្នាក់ចរាចរណ៍ឆ្នាំ២០២១ ភាគច្រើននៅរាជធានីភ្នំពេញ ខេត្តកណ្ដាល និងខេត្តកំពង់ចាម។ មូលហេតុបណ្ដាលឲ្យមានគ្រោះថ្នាក់សរុប រួមមានបើកបរលើសល្បឿនកំណត់៣៨ភាគរយ មិនគោរពសិទ្ធិ២៤ភាគរយ មិនប្រកាន់ស្ដាំ១៤ភាគរយ វ៉ាជែង៨ភាគរយ បត់៨ភាគរយ ស្រវឹង៤ភាគរយ យានយន្ត៣ភាគរយ និងងងុយ១ភាគរយ។
ជាមួយគ្នានេះ សមត្ថកិច្ចបានត្រួតពិនិត្យយានយន្តសរុបជាង២លានគ្រឿង ក្នុងនោះម៉ូតូជាង៦០ភាគរយ, រកឃើញយានយន្តល្មើសនិងពិន័យជាង២២៣ពាន់គ្រឿង ក្នុងនោះម៉ូតូជាង៧០ភាគរយ និងពិន័យបានថវិកាសរុបជាង១៩ប៊ីលានរៀល៕
© រក្សាសិទ្ធិដោយ thmeythmey.com