អន្តរជាតិ
ស្ថានទូតចិននៅអ៊ុយក្រែន ជំរុញឱ្យប្រជាជនចៀសពីតំបន់អស្ថិរភាព ខណៈភាពតានតឹងកើនឡើង ទិដ្ឋភាពទីក្រុង Kharkiv របស់អ៊ុយក្រែន។ រូបថត AFP
× ស្ថានទូតចិនប្រចាំទីក្រុងកៀវនៅថ្ងៃទី២២ ខែកុម្ភៈ បានព្រមានពលរដ្ឋចិន និងអ្នកជំនួញ ដែល រស់នៅ អ៊ុយក្រែនឱ្យចៀសឆ្ងាយពីតំបន់អស្ថិរភាពដើ់ម្បីការពារសុវត្ថិភាពរបស់ខ្លួន។ យ៉ាងណាមិញ ស្ថានទូតចិន មិនទាន់អំពាវនាវឱ្យប្រជាជនរបស់ខ្លួនចាកចេញពីប្រទេសមួយនេះដូចដែលប្រទេសផ្សេងៗបានប្រកាសនោះឡើយ។
ក្នុងមួយរយៈចុងក្រោយនេះ វិបត្តិនៅអ៊ុយក្រែនកាន់តែតានតឹងទៅខណៈមានការប៉ះទង្កិច គ្នារវាងក្រុមផ្តាច់ខ្លួននៅតំបន់ភាគខាងកើតអ៊ុយក្រែន និងកម្លាំងយោធាអ៊ុយក្រែន។ មិនតែប៉ុណ្ណោះ ប្រធានាធិបតីរុស្ស៊ី វ្ល៉ាឌីមៀ ពូទីន បានបញ្ជាឱ្យមានការដាក់ពង្រាយទ័ពនៅតំបន់ផ្ដាច់ខ្លួនដែលនៅភាគខាងកើតអ៊ុយក្រែនក្នុងលេសរក្សាសន្តិភាពបន្ទាប់ពីបានទទួលស្គាល់ឯករាជ្យរបស់ក្រុមផ្ដាច់ខ្លួន។
ប្រឈមមុខនឹងវិបត្តិនេះ នៅថ្ងៃទី២២ ខែកុម្ភៈ ស្ថានទូតចិននៅក្រុងកៀវបានប្រកាសក្នុងសេចក្ដីថ្លែងការណ៍មួយថា នាពេលនេះ ស្ថានភាពនៅអ៊ុយក្រែនភាគខាង កើតបានឆ្លងកាត់ការផ្លាស់ប្តូរយ៉ាងខ្លាំងមួយ។ ស្ថានទូតចិន បានក្រើនរំលឹកប្រជាជនរបស់ខ្លួន និងសហគ្រាសចិននៅអ៊ុយក្រែនឱ្យយកចិត្តទុកដាក់លើសេចក្តីជូនដំណឹងអំពីសុវត្ថិភាពដែលបានចេញផ្សាយក្នុងស្រុក ហើយមិនត្រូវទៅតំបន់ណា ដែលអស្ថិរភាពនោះឡើយ។
ជុំវិញបញ្ហាអសន្តិសុខនេះ ប្រទេសមួយចំនួនមានអាម៉េរិក ចក្រភពអង់គ្លេស និងអាល្លឺម៉ង់សុទ្ធតែបានប្រាប់ប្រជាជនរបស់ខ្លួនឱ្យចាកចេញពីអ៊ុយក្រែនដោយសារបារម្ភខ្លាចការឈ្លានពានពីរុស្ស៊ី។ ផ្ទុយទៅវិញ ចិនឯនេះវិញបានប្រាប់ប្រជាជនខ្លួនឱ្យតាមដានស្ថានការណ៍នៅអ៊ុយក្រែន ហើយនឹងបន្តដំណើរការស្ថានទូតរបស់ខ្លួនដូចធម្មតា។ លើសពីនេះ ចិនក៏បានរិះគន់អាម៉េរិកថា បានពន្លើសពីការគំរាមនៃសង្គ្រាមទៀតផង។
គួររំលឹកថា រុស្ស៊ីតែងតែបដិសេធផែនការវាយប្រហារអ៊ុយក្រែន ប៉ុន្តែក៏បានគំរាមនឹងចាត់ចំណាត់ការយោធា ប្រសិនបើសន្តិសុខរបស់់ប្រទេសខ្លួនមិនត្រូវបានការពារ ហើយអ៊ុយក្រែនចុះចូលជាមួយសម្ព័ន្ធយោធាណាតូទៀតនោះ៕
© រក្សាសិទ្ធិដោយ thmeythmey.com