វិបត្តិអ៊ុយក្រែន ដែលរកច្រកចេញមិនឃើញ បែរទៅជាកាន់តែតានតឹងក្រោយរុស្ស៊ីប្រកាសទទួលស្គាល់តំបន់ផ្ដាច់ខ្លួនពីរជារដ្ឋឯករាជ្យ។ ទណ្ឌកម្មពីអាម៉េរិក និងបណ្ដាប្រទេសលោកខាងលិច បានធ្លាក់លើទីក្រុងមូស្គូជាបន្តបន្ទាប់។ ខណៈបារាំង​ អាល្លឺម៉ង់ និងអាម៉េរិក សុទ្ធតែមិនអាចប្រើការទូតដើម្បីបន្ធូរស្ថានការណ៍ ទីក្រុងវ៉ាស៊ីនតោន ក៏សម្លឹងឃើញចិនដែលជាសម្ព័ន្ធមិត្តជិតស្និទ្ធរបស់រុស្ស៊ី។ 

 

នាសន្និសីទសារព័ត៌មានថ្ងៃទី២៣ ខែកុម្ភៈ លោក Ned Price អ្នកនាំពាក្យក្រសួងការបរទេសអាម៉េរិក និយាយថា ប្រទេសដែលមានការទទួលខុសត្រូវលើពិភពលោក រួមទាំងចិនផង មានកាតព្វកិច្ចទទូចឱ្យប្រធានាធិបតីរុស្ស៊ី វ៉ា្លឌីមៀ ពូទីន ដកថយ ហើយបញ្ចៀសស្ថានការណ៍តានតឹង។ អ្នកនាំពាក្យរូបនេះ ក៏ស្នើឱ្យចិនប្រើទំនាក់ទំនងជាមួយរុស្ស៊ីដើម្បីជួយដោះស្រាយវិបត្តិអ៊ុយក្រែននេះដែរ។

 

«អ្នកត្រូវតែសួរថា សាធារណរដ្ឋប្រជាមានិតចិនបានប្រើឥទ្ធិពលរបស់ខ្លួនដែលមានជាមួយសហព័ន្ធរុស្ស៊ីលើគោលដៅនេះឬអត់។» មន្ត្រីក្រសួងការបរទេសអាម៉េរិកបញ្ជាក់បែបនេះ មុនបន្តថា ចិនតែងលើកឡើងពីគោលការណ៍គោរពអធិបតេយ្យជាតិ ដូចនេះចិនគួរប្រើជំហររបស់ខ្លួនតាមនោះដែរ។

 

ទាក់ទងសំណួរពីតួនាទីរបស់ខ្លួនលើបញ្ហាអ៊ុយក្រែន ក្រសួងការបរទេសចិនវិញអះអាងថា ចិនតែងតែប្រកាន់ខ្ជាប់ការជំរុញសន្តិភាព និងការចរចា ហើយតែងដើរតួនាទីស្ថាបនាដើម្បីរកច្រកចេញពីជម្លោះនេះ។ នាសន្និសីទសារព័ត៌មានថ្ងៃទី២៣ ខែកុម្ភៈ លោកស្រី Hua Chunying អ្នកនាំពាក្យក្រសួងការបរទេសចិន ក៏ចោទអាម៉េរិកថា អាម៉េរិកបានបញ្ជូនសព្វាវុធទៅអ៊ុយក្រែន ដុតបញ្ឆេះភាពតានតឹង ហើយបង្កចលាចលថែមទៀត។

 

អ្នកនាំពាក្យដដែល ក៏ចោទសួរតួនាទីរបស់អាម៉េរិកវិញ និងចោទទីក្រុងវ៉ាស៊ីនតោនថា ជាអ្នកនៅពីក្រោយវិបត្តិអ៊ុយក្រែនទៅទៀត។ លោកស្រី Hua លើកឡើងថា វាមិនមែនជាអាកប្បកិរិយាល្អ និងគ្មានការទទួលខុសត្រូវឡើយ នៅពេលប្រទេសខ្លះចាក់សាំងលើភ្លើង ហើយចោទគេឯងមិនព្រមជួយពន្លត់ភ្លើងនោះ៕