មេដឹកនាំចិន និងរុស្ស៊ី នៅថ្ងៃទី២៥ ខែកុម្ភៈ បានជជែកគ្នាតាមទូរស័ព្ទ ដោយវិបត្តិនៅអ៊ុយក្រែនជាប្រធានបទសំខាន់។ លោកប្រធានាធិបតីរុស្ស៊ី វ៉ា្លឌីមៀ ពូទីន បានប្រាប់សមភាគីចិន ស៊ី ជិនភីង ពីជំហររបស់រុស្ស៊ី និងហេតុផលដែលរុស្ស៊ីសម្រេចចិត្តធ្វើប្រតិបត្តិការយោធានៅក្នុងទឹកដីប្រទេសជិតខាងមួយនេះ។

 

បើតាមទីភ្នាក់ងារព័ត៌មានរដ្ឋចិន Xinhua លោក ពូទីន បញ្ជាក់ថា អាម៉េរិក និងអង្គការសន្ធិសញ្ញាអាត្លង់ទិកខាងជើង ឬណាតូ មិនខ្វល់ខ្វាយពីក្ដីបារម្ភផ្នែកសន្តិសុខរបស់រុស្ស៊ីឡើយ និងបានក្បត់សម្ដីម្ដងហើយម្ដងទៀត ហើយបន្តការពង្រាយទ័ពមកប៉ែកខាងកើត។ សម្រាប់លោក ពូទីន សកម្មភាពទាំងនេះ​ ជាការបំពានបន្ទាត់ក្រហមសន្តិសុខរបស់រុស្ស៊ីតែម្ដង។ ទោះជាយ៉ាងណា លោកអះអាងថា រុស្ស៊ីត្រៀមបញ្ជូនប្រតិភូទៅចរចាជាមួយតំណាងអ៊ុយក្រែននៅបេឡារុស។

 

លោក ស៊ី វិញ និយាយថា វិបត្តិនៅប៉ែកខាងកើតអ៊ុយក្រែន បានទាក់ទាញចំណាប់អារម្មណ៍សហគមន៍អន្តរជាតិយ៉ាងខ្លាំង។ លោកប្រកាសជំហររបស់ចិនថា ចិនចិនសម្រេចចិត្តលើបញ្ហាអ៊ុយក្រែនទៅតាមស្ថានការណ៍។ មិនខុសពីបញ្ហាកន្លងទៅឡើយ ប្រមុខរដ្ឋចិន ស្នើឱ្យប្រទេសនានាបោះបង់គំនិតសល់ពីសង្រ្គាមត្រជាក់ ផ្ដល់ការគោរពដល់ក្ដីបារម្ភផ្នែកសន្តិសុខដល់ប្រទេសនានា ហើយបង្កើតយន្តការសន្តិសុខនៅអឺរ៉ុបតាមការចរចា។

 

«ភាគីចិនគាំទ្រភាគីរុស្ស៊ីក្នុងការដោះស្រាយបញ្ហាតាមការចរចាជាមួយភាគីអ៊ុយក្រែន។» ទីភ្នាក់ងារព័ត៌មាន Xinhua ស្រង់សម្ដីលោក ស៊ី ប្រាប់លោក ពូទីន បែបនេះ។ ប្រធានាធិបតីចិន ក៏មិនភ្លេចបញ្ជាក់ទៅកាន់សមភាគីរុស្ស៊ីរបស់លោកថា ចិនមានជំហរមិនផ្លាស់ប្ដូរឡើយលើការគោរពអធិបតេយ្យ និងបូរណភាពទឹកដីប្រទេសទាំងអស់ ក៏ដូចជាអនុវត្តតាមគោលការណ៍ និងធម្មនុញ្ញអង្គការសហប្រជាជាតិផងដែរ៕